Հասարակություն
14.10.2026 | 12:00
ՀՀ 2-րդ նախագահի նկատմամբ քրեական հետապնդումը զրկում է նրան և իր քաղաքական թիմին բնականոն քաղաքական գործունեություն ծավալելուց․ այս մասին հրավիրված ասուլիսի ժամանակ հայտարարեց Ռոբերտ Քոչարյանի գրասնեյակի ղեկավար Բագրատ Միկոյանը։
Բանախոսի պնդմամբ՝ կալանավորման որոշումների տակ բացակայում է վարչապետ Նիկոլ Փաշինյանի ստորագրությունը, սակայն կան կոնկրետ կատարողների անուններ, մասնավորապես՝ Գլխավոր դատախազ Աննա Վարդապետյանի, դատավոր Ծովակ Մնացականյանի և այլ դատավորների անունները։
«Վաղը, մյուս օրը մորքուրները, հորքուրները, քեռիները և առավել ևս՝ բաջանաղները որևէ միջնորդությամբ չգան, թե՝ «երեխաները չէին հասկանում»։ Երեխաներն արդեն հասուն են, իսկ պատասխանատվության պահը գալիս է անսպասելի»,- ասաց նա։
Ըստ Միկոյանի՝ կալանավորման պատվերը ստացվել է «կողքի պետությունից», իսկ դրա իրականացնողները հայկական անուն-ազգանուններով անձինք են։
Անդրադառնալով նախաքննությանը խոչընդոտելու հիմնավորմամբ տնային կալանքը մերժելուն՝ բանախոսը մատնանշեց, որ Ռոբերտ Քոչարյանի բնակության վայրը 24-ժամյա ռեժիմով հսկվում է ՊՊԾ աշխատակիցների կողմից, և բոլոր այցելուների մասին պատկան մարմինները նախապես տեղյակ են լինում․ «Նույնիսկ ադրբեջանցիների մտքով չի անցել Բաքվում որևէ մեկի որդուն կալանավորել։ Բաքվի բանտում մենք չունենք հայր և որդի, իսկ Բաքվի բանտի երևանյան մասնաճյուղում ունենք հայր և որդի»։
Եզրափակելով խոսքը՝ բանախոսը կոչ արեց կատարողներին սթափվել և դասեր քաղել միջազգային զարգացումներից։
Մանրամասները՝ տեսանյութում։
Եվգենյա Համբարձումյան