Ադրբեջանի դեմ որոշ թուրքական լրատվամիջոցների և սոցիալական հարթակների կողմից վերջերս իրականացված կողմնակալ տեղեկատվական արշավը, ինչպես նաև իշխող «Արդարություն և զարգացում» կուսակցության որոշ պատգամավորների և Թուրքիայի Հանրապետության նախագահի գլխավոր խորհրդական Օքթայ Սարալի կողմից մեր երկրի հասցեին հնչեցված անհիմն մեղադրանքները լուրջ մտահոգության և ափսոսանքի տեղիք են տալիս Ադրբեջան-Թուրքիա միջխորհրդարանական հարաբերությունների աշխատանքային խմբի համար․ այս մասին հայտնել է Միլլի Մեջլիսի մամուլի և հասարակայնության հետ կապերի բաժնից։
Հայտարարության մեջ նշվում է, որ Ադրբեջանի և Թուրքիայի միջև գոյություն ունեն բարեկամության, եղբայրության և ռազմավարական դաշնակցության հարաբերություններ.
«Ադրբեջանն անկախ և ինքնիշխան պետություն է, որն ինքնուրույն է որոշում իր ներքին և արտաքին քաղաքականությունը՝ համապատասխան իր ազգային շահերի և Սահմանադրության։ Ազգային առաջնորդ Հեյդար Ալիևի կողմից ձևակերպված «Մեկ ազգ, երկու պետություն» սկզբունքը հենց ենթադրում է երկու անկախ և ինքնիշխան պետությունների գոյություն։ Անընդունելի է այս սկզբունքի էության խեղաթյուրումը կամ դրա օգտագործումը որպես պատրվակ՝ Ադրբեջանի ներքին գործերին միջամտելու կամ ադրբեջանական հասարակությանը արտաքին քաղաքական և գաղափարական մոտեցումներ պարտադրելու համար։
Ադրբեջանի պետական կառուցվածքի աշխարհիկ բնույթը և կրոնի ազատությունը երաշխավորված են Սահմանադրությամբ։ Մեր երկրի կրթական քաղաքականությունը հիմնված է աշխարհիկության, հավասարության և բոլոր քաղաքացիների համար հավասար հնարավորությունների ստեղծման սկզբունքների վրա։ Կրթական հաստատություններում գործող կանոնները հավասարապես տարածվում են բոլոր քաղաքացիների վրա և ուղղված չեն որևէ կրոնական պատկանելության դեմ։ Անթույլատրելի է այս հարցերի քաղաքականացումը կրոնական և գաղափարական հիմքերով կամ Ադրբեջանի սահմանադրական կարգի և կրթական քաղաքականության դեմ անհիմն մեղադրանքներ հնչեցնելը։ Ադրբեջանի Հանրապետության Նախագահի՝ Հաղթանակած Գերագույն գլխավոր հրամանատար պարոն Իլհամ Ալիևի, ինչպես նաև մեր ժողովրդի, մեր պատմության և ականավոր գործիչների հասցեին վիրավորական և զրպարտչական արտահայտությունների կիրառումն անընդունելի է և արդարացված դժգոհություն է առաջացնում ադրբեջանական հասարակության շրջանում։ Ցավով պետք է նշենք, որ իշխող «Արդարություն և զարգացում» կուսակցությունը որևէ քայլ չի ձեռնարկում դա կանխելու ուղղությամբ։ Թուրքիայում Ադրբեջանի դիվանագիտական ներկայացուցչությունների մոտ տեղի ունեցող սադրիչ գործողությունների, ինչպես նաև դրանց առնչվող կոչերի նկատմամբ ցուցաբերվող հանդուրժողականությունը մի շարք հարցեր է առաջացնում։
Մենք կարծում ենք, որ ադրբեջանա-թուրքական հարաբերությունների առանձնահատուկ բնույթը պահանջում է հետևել քաղաքական պատասխանատվության, փոխադարձ հարգանքի և միմյանց ներքին գործերին չմիջամտելու սկզբունքներին։ Առանձին քաղաքական գործիչների հայտարարությունները չպետք է վնասեն երկու երկրների միջև հարաբերություններին։
Որպես Ադրբեջան-Թուրքիա միջխորհրդարանական բարեկամության խումբ՝ մենք ակնկալում ենք, որ Թուրքիայի համապատասխան քաղաքական շրջանակները, այդ թվում՝ խորհրդարանում իշխող կուսակցության ներկայացուցիչները, պատասխանատվությամբ կմոտենան այս զգայուն հարցերին, կհարգեն Ադրբեջանի ինքնիշխանությունն ու սահմանադրական կարգը և կզերծ մնան այնպիսի հայտարարություններից, որոնք կարող են բացասաբար անդրադառնալ մեր հարաբերությունների վրա»։