Ֆրեզնոյի 180 բնակիչ միացել է Մոնթե Մելքոնյանի հուշարձանի կառուցմանը։ Նրանց նվիրատվություններով իրականացվող աշխատանքներն արդեն եզրափակիչ փուլում են։ Քաղաքապետարանի՝ արձանի տեղադրման թույլտվությունը ստացվել է։ Շինարարությունը նախատեսվում է ավարտել մեկ ամսվա ընթացքում։
Հայ-Ամերիկյան Տեղեկատվական Կենտրոնից NEWS.am-ին հայտնում են, որ Ֆրեզնոյում Մոնթեի հուշարձան ունենալու գաղափարն առաջարկել է բժիշկ և հասարակական գործիչ Կարո Խաչիկյանը։ Նրան միացել են բազմաթիվ ֆրեզնոյահայեր՝ ով գումարով, ով աշխատանքով։ Յուրաքանչյուրն օգնել է իր հնարավորության չափով:
«Կարևոր է, որ մեր հերոսներին չմոռանանք։ Ուզում ենք, որ ծնողները երեխաների հետ գան այս արձանի մոտ ու պատմեն Մոնթեի մասին՝ ով էր նա, ինչպես էր ապրում, ինչի համար էր պայքարում։ Երեխաները պիտի ճանաչեն նրան։ Շնորհակալ եմ բոլոր նվիրատուներին։ Ամեն մեկի օգնությունը մեզ պետք է եղել, և նրանց մասնակցությամբ է, որ կարողանում ենք ավարտին հասցնել այս գործը»,- ասում է Կարո Խաչիկյանը։
Մոնթեի գրանիտե արձանը տեղադրվելու է Սողոմոն Թեհլիրյանի հուշարձանի հարևանությամբ։ Քարապատ պատվանդանը ժայռի տեսք կունենա՝ հիշեցնելով հայրենի լեռները։ Հայերեն և անգլերեն գրությունները կպատմեն Մոնթեի կյանքի ու մարտական ճանապարհի մասին։ Նրա պատմությանը կկարողանան ծանոթանալ նաև հայերեն չկարդացող այցելուները։
Հուշարձանի ճարտարապետներն են Շանթ Եմենջյանն ու Ջորջ Քիլեջյանը, քանդակագործը՝ Մաղաքիա Սիմոնյանը։ Շինարարական աշխատանքներն իրականացնում է Ջիվան Բզնունին։
Մոնթե Մելքոնյանը զոհվել է 1993 թվականի հունիսի 12-ին՝ մարտական գործողության ժամանակ։ Նա 35 տարեկան էր։ Նրա խիզախությունը, կարգապահությունն ու հայրենիքի հանդեպ նվիրումը ճանաչողների հիշողության մեջ են։ Ֆրեզնոյում կառուցվող հուշարձանն այդ հիշողությունը կփոխանցի նաև նրանց, ովքեր Մոնթեին չեն տեսել և նրա մասին դեռ պիտի իմանան։
Հուշարձանի բացման առիթով նախատեսվում է համայնքային մեծ հանդիսություն։ Արարողության օրը կհայտարարվի լրացուցիչ։