Իրանի նախագահ Մասուդ Փեզեշքիանը դատապարտել է երկրի հարավ-արևելքում Սիստան և Բելուջիստան նահանգի ոստիկանության հրամանատարի տեղակալի սպանությունը։ Նա հայտարարել է, որ ահաբեկչական հարձակումները չեն խանգարի իրավապահ մարմիններին ապահովել քաղաքացիների անվտանգությունը, հաղորդել է Mehr-ը։
Շաբաթ օրը հրապարակված հայտարարության մեջ Փեզեշքիանը ցավակցություն է հայտնել Նոսրաթ Էֆթեխարիի մահվան կապակցությամբ, որը զբաղեցնում էր նահանգային ոստիկանության վարչության մշակութային և սոցիալական հարցերով պետի տեղակալի պաշտոնը։
Իրանական լրատվամիջոցների տվյալներով՝ ուրբաթ Էֆթեխարիի ավտոմեքենան գրոհի է ենթարկվել պայթուցիկ սարքով Զահեդանի մերձակայքում՝ Չեշմե-Զիյարաթ գյուղի ճանապարհին։ Հարձակման հետևանքով վիրավորվել են ոստիկանության ևս մի քանի աշխատակիցներ։
«Կույր ահաբեկչական գործողությունները, որոնք ուղղված են անկայունություն ստեղծելուն, բռնության տարածմանը և հասարակական անդորրը խախտելուն, ոչնչի չեն հանգեցնի, բացի անմեղ մարդկանց զոհվելուց և դրանց հետևում կանգնածների հանցավոր էության բացահայտումից», — հայտարարել է նախագահը։
Նա Էֆթեխարիի սպանությունն անվանել է անմարդկային հանցագործությունների «դառը օրինակ» և ցավակցություն հայտնել նրա ընտանիքին, ոստիկանության ղեկավարությանը և աշխատակիցներին, զոհվածի գործընկերներին ու նահանգի բնակիչներին։
Փեզեշքիանն ընդգծել է, որ հարձակումը չի ստիպի անվտանգության ուժերին հրաժարվել քաղաքացիների կյանքի և բարեկեցության պաշտպանությունից։ Նրա խոսքով՝ ահաբեկչության դեմ պայքարը և հասարակական անվտանգության ապահովման ջանքերը կշարունակվեն։
Իրանի նախագահը նաև կոչ է արել իրավասու մարմիններին անհապաղ և մանրակրկիտ հետաքննել տեղի ունեցածը, բացահայտել հանցագործությունը կատարողներին և նրանց, ովքեր տվել են դրա իրագործման հրամանը։
Հայտարարության վերջում Փեզեշքիանը հարգանքի տուրք է մատուցել ոստիկանության զոհված աշխատակցուհու և այլ զոհված իրավապահների հիշատակին՝ նրանց ընտանիքներին մաղթելով համբերություն և ուժ։