Եկեք արձանագրենք, որ այն ընդերքը, որ այսօր մեր աչքի առջև դարձավ ոսկի, ՀՀ-ին է պատկանում և ՀՀ ժողովրդի սեփականությունն է. վարչապետ
Բաժանորդագրվեք Zarkerak.am-ի տելեգրամ ալիքին։
Այսօր մենք լրումին ենք հասցնում Ամուլսարի երկարամյա էպոպեան, և, իհարկե, սա հաջողության պատմություն է միանշանակ: Այս մասին Ամուլսարի հանքավայրի շահագործման մեկնարկին նվիրված իր ելույթում ասաց ՀՀ վարչապետ Նիկոլ Փաշինյանը:
Նրա խոսքով՝ պետք է նախ՝ անդրադառնալ այն հարցին, թե ինչու ենք մենք այսօր այսպիսի հանդիսավոր միջավայրում կարողանում այս միջոցառումը կազմակերպել՝ առանց մոտակայքում բողոքի ակցիաների:
«Կարծում եմ՝ շատ կարևոր է այս հարցին պատասխանելը: Բոլորդ գիտեք, որ Ամուլսարի նախագիծը տարբեր դրսևորումներով է արտահայտվել, և ես կարծում եմ, որ նաև այդ անցած ճանապարհը պետք է վերլուծել՝ հետագայում ներդրումային ծրագրերի հետ կապված գործելակարգեր որդեգրելու համար:
Կարծում եմ՝ կարևորագույն խնդիրներից մեկը այդ ամենի վերաբերյալ հանրության ընկալումն ու իրազեկումը բարձրացնելն է, և մեր քաղաքականությունը խնդրի հետ առնչվելու առաջին վայրկյաններից եղել է հետևյալը՝ նախ՝ պատասխան ձևակերպել հանրությանը հուզող բոլոր հարցերին և երկրորդ՝ ամեն ինչ անել, որ ՀՀ քաղաքացիները հնարավորինս տեսանելի և շոշափելի կերպով այս նախագիծը համարեն նաև իրենցը:
Եկեք ի վերջո արձանագրենք, որ այն ընդերքը, որ այսօր մեր աչքի առջև դարձավ ոսկի, այդ ընդերքը ՀՀ-ին է պատկանում և ՀՀ ժողովրդի սեփականությունն է:
Մեզ համար մեծագույն խնդիր է եղել ի ցույց դնել, որ այդ հարստությունը ծառայելու է ՀՀ-ի զարգացմանը և բարեկեցությանը, և իհարկե, այս ներդրումային ծրագրի ճակատագիրը էական նշանակություն է ունենալու նոր՝ այսպիսի ներդրումային ծրագրեր բերելու համար»,- ասաց վարչապետը: