Փոփ-երաժշտության արքա Մայքլ Ջեքսոնի 1983 թվականի լեգենդար «Thriller» տեսահոլովակի սև-կարմիր կաշվե բաճկոնը դեկտեմբերի 7-9-ը Աբու Դաբիում կհանվի աճուրդի։ Այս մասին պաշտոնապես հայտնել է «Julien’s Auctions» աճուրդային տունը։
«Մայքլ Ջեքսոն. Նորաձևության ժառանգությունը» (Michael Jackson: The Fashion Legacy) խորագրով աճուրդում կուլտային բաճկոնի սկզբնական գինը գնահատվում է ավելի քան 10 միլիոն դոլար։ Միջոցառման ընթացքում վաճառքի կհանվեն նաև երգչի բեմական կոստյումները, տեսահոլովակների հագուստներն ու անձնական զգեստները, որոնք ստեղծվել են նրա դիզայներներ Դենիս Թոմփքինսի և Մայքլ Բուշի կողմից։
Հատկանշական է, որ նույն այս սև-կարմիր բաճկոնը «Julien’s Auctions» աճուրդային տան կողմից 2011 թվականին Կալիֆոռնիայում վաճառվել էր 1,8 միլիոն դոլարով։ Տարիների ընթացքում երաժշտական լեգենդի անձնական իրերի պատմական արժեքն ու պահանջարկն աճել են անհամեմատելի մասշտաբներով։