Amazon-ը պատրաստ է Հայաստանում ներդրումներ անել, եթե ապահովվի շուրջօրյա կայուն էներգամատակարարում. վարչապետ
Բաժանորդագրվեք Zarkerak.am-ի տելեգրամ ալիքին։
«Amazon-ը պատրաստ է Հայաստանում ներդրումներ կատարել, եթե ապահովվի ընկերության համար անհրաժեշտ շուրջօրյա կայուն էլեկտրամատակարարումը»:
Այս մասին «Ինֆոքոմ»-ին տված հարցազրույցում հայտարարել է վարչապետ Նիկոլ Փաշինյանը՝ հղում անելով բարձր տեխնոլոգիական արդյունաբերության նախարարից ստացած նամակին։
«Amazon-ը պատրաստ է Հայաստանում ներդրումներ անել, բայց իրեն 1000-մեգավատտանոց կայան է պետք։ Ասում է՝ եթե դուք կասեք, որ 1000-մեգավատտանոց կայան կլինի, ես Հայաստանում համապատասխան չափի ներդրումներ կանեմ»,- ասել է վարչապետը։
Նա չի հստակեցրել հնարավոր ներդրումների չափը, նախագծի բնույթը կամ իրականացման ժամկետները։
Փաշինյանը մանրամասնել է, որ ընկերությանը շուրջօրյա կայուն էներգամատակարարում է անհրաժեշտ։ Այդ համատեքստում նա խոսել է ատոմակայանի, էներգիայի կուտակիչների և հողմային կայանների անհրաժեշտության մասին։
Վարչապետի խոսքով՝ Հայաստանում արհեստական բանականության ոլորտում արդեն հաստատված նախագծերի էներգետիկ պահանջարկը գերազանցում է երկրի առկա կարողությունները։ Նա նոր ներդրումային ծրագրերով է բացատրել ավելի մեծ հզորությամբ ատոմակայան կառուցելու նկատմամբ կառավարության աճող հետաքրքրությունը։