ԱԺ նախագահ Ռուբեն Ռուբինյանը հայտարարել է, որ ծառայողական քննություն կսկսվի «Ուժեղ Հայաստան» խմբակցության պատգամավորների այն օգնականների նկատմամբ, որոնք փորձել են ներխուժել ԱԺ նիստերի դահլիճ ու մասնակցել միջադեպին, հայտնում է Sputnik Արմենիան:
Մինչ այդ խորհրդարանում իրավիճակը լարվել է, ինչից հետո իշխող «Քաղաքացիական պայմանագիր» և ընդդիմադիր «Ուժեղ Հայաստան» խմբակցությունների պատգամավորների միջև քաշքշոց ու ծեծկռտուք է սկսվել։ Բախումը շարունակվել է նաև Ազգային ժողովի միջանցքում։
«Նման դեպքի կրկնություն այլևս երբեք ես թույլ չեմ տալու»,– վստահեցրել է նա։
Դրանից հետո Ազգային ժողովն անցել է «ՀՀ տոների և հիշատակի օրերի մասին» օրենքում փոփոխություն կատարելու մասին նախագծի քննարկմանը։
Մինչ այդ «Հայաստան» և «Ուժեղ Հայաստան» խմբակցությունների ղեկավարները հայտարարել են, որ չեն մասնակցելու «Հայաստանյայց Առաքելական սուրբ եկեղեցում առաջացած ճգնաժամն ուսումնասիրող քննիչ հանձնաժողովի» ստեղծման և դրա անդամների թվի վերաբերյալ քննարկմանը։
Ազգային ժողովում «Ուժեղ Հայաստան» խմբակցության պատգամավոր Էդգար Ղազարյանի ելույթից հետո իրավիճակը լարվել է, հրմշտոց է սկսվել: 2 անգամ ընդմիջում է հայտարարվել: Իրավիճակը դահլիճում կրկին լարվել է ՔՊ–ական պատգամավոր Տարոն Չախոյանի ելույթից հետո, երբ նա Ամենայն Հայոց կաթողիկոս Գարեգին 2–րդին անվանել է ավազանի անունով։ Որպես բողոքի նշան «Ուժեղ Հայաստանի» պատգամավորները սկսել են խփել սեղաններին։