Արևմտյան երկրները Վրաստանը կդիտարկեին որպես Ռուսաստանի Դաշնության դեմ ուղղված բուֆերային գոտի՝ նման Ուկրաինային, եթե չլինեին վրացական իշխանությունների գործողությունները, որոնք թույլ չտվեցին դա տեղի ունենալ։
Այս մասին լրագրողներին հայտնել է իշխող «Վրացական երազանք – Ժողովրդավարական Վրաստան» կուսակցության գլխավոր քարտուղար և Թբիլիսիի քաղաքապետ Կախա Կալաձեն։
«Ուկրաինան արդեն իսկ բնորոշվում է որպես բուֆերային գոտի, ինչը տխուր իրողություն է։ Եթե չլինեին մեր սկզբունքային դիրքորոշումն ու «Վրացական երազանք – Ժողովրդավարական Վրաստան»-ի կողմից ներկայումս վարվող քաղաքականությունը, մենք, ցավոք, նույն ճակատագրին կարժանանայինք», – ասել է Կալաձեն։
Չնայած վիրավորանքներին, ճնշումներին, զրպարտանքներին և սպառնալիքներին՝ վրացական իշխանություններին հաջողվել է պաշտպանել երկրի շահերը, վրաց ժողովրդին, տնտեսությունն ու ազգային զարգացումը, հավելել է Կալաձեն։ «Մենք պաշտպանել ենք յուրաքանչյուր քաղաքացու՝ շնորհիվ «Վրացական երազանք – Ժողովրդավարական Վրաստան»-ի իրականացրած քաղաքականության», – եզրափակել է նա։