Պետք է ոչ միայն ծառայողական քննություն արվի, այլև տվյալ տարածքը տոտալ տակնուվրա անեին, որպեսզի իրողությունը պարզ լինի, այս մասին ԱԺ-ում լրագրողների հետ ճեպազրույցում ասաց ՔՊ-ական պատգամավոր Անդրանիկ Քոչարյանն՝ անդրադառնալով Շաքիի դեպքին:
Թե որ կառույցն է թերացել, պաշտպանության և անվտանգության հարցերի մշտական հանձնաժողովի նախկին նախագահը դժվարանում է միանգամից պատասխանել:
Նա միայն նշեց, որ ադրբեջանցի զինծառայողի՝ Հայաստան ներթափանցելու հարցն իր ուշադրության կենտրոնում է, առաջիկայում այդ հարցով մի շարք գերատեսչություններից պատասխաններ կստանա:
Անդրադառնալով ընդդիմության մտահոգություններին, որ հայկական կողմը հնարավոր է որպես «բարի կամքի դրսևորում» հայ կնոջ վրա կրակած ադրբեջանցուն հանձնի՝ Անդրանիկ Քոչարյանն ասաց, որ պետք է շարժվել հարուցված քրեական գործի պահանջներով:
«Եթե պետք է հանձնել, դա նշանակում է, որ հանձնելը հենց այնպես չի լինում, այլ՝ ինչ-որ բանի դիմաց»,- նշեց պատգամավորը: