ՕՊԵԿ+-ի յոթ երկրների, այդ թվում՝ Ռուսաստանի, Սաուդյան Արաբիայի, Ալժիրի, Քուվեյթի, Իրաքի, Ղազախստանի և Օմանի էներգետիկայի նախարարները հոկտեմբերի 4-ին կայացած ամենամսյա առցանց հանդիպման արդյունքներով որոշել են նոյեմբերին ևս պահպանել նավթի արդյունահանման գործող քվոտաները։
Համաձայնագրի առաջատար երկրների համար նավթի արդյունահանման առավելագույն մակարդակը չի փոխվել։ Սաուդյան Արաբիայի համար այն պահպանվել է օրական 10.478 մլն բարել, Ռուսաստանի համար՝ օրական 9.949 մլն բարել։ Իրաքը կկարողանա արդյունահանել օրական 4.431 մլն բարել, Քուվեյթը՝ 2.676 մլն, Ղազախստանը՝ 1.628 մլն, Ալժիրը՝ 1.007 մլն, իսկ Օմանը՝ օրական 841 հազար բարել։ Գործարքի մասնակիցները վերահաստատել են պայմանավորվածությունների ամբողջական կատարմանը հասնելու իրենց մտադրությունը։
Յոթ երկրների ներկայացուցիչները կշարունակեն ամենամսյա հանդիպումներ անցկացնել՝ շուկայական իրավիճակը գնահատելու համար։ Հաջորդ նիստը նախատեսված է նոյեմբերի 1-ին։