Լևոն Քոչարյան․ Եղբորս բիզնեսում չկա որևէ գումար, որ իր օրինական բացատրությունը չունենա

Սեդրակ Քոչարյանի բիզնեսում չկա որևէ գումար, որ իր օրինական բացատրությունը չունենա, հայտարարել է «Հայաստան» խմբակցության պատգամավոր Լևոն Քոչարյանը՝ անդրադառնալով եղբոր դեմ հարուցված քրեական գործին:

Նա հավելել է, ր Սեդրակ Քոչարյանն ամուր և պինդ է, իսկ խցում միայնակ չէ, հայտնում է Sputnik Արմենիան:

«Եթե Նիկոլ Փաշինյանին թվում է, թե հորս վրա ճնշումը մեծացնելու նպատակով պետք է որդուն էլ բանտարկի ու ինչ-որ արդյունքի հասնի, վստահեցնում եմ, որ նման բան չկա։ Բոլորս էլ պատրաստ ենք, գիտենք՝ ինչի համար ենք պայքարում, և այս ամենն իրենց ցանկացած արդյունքը չի՛ տալու, սա միանշանակ է։ Մնացած մասով հետագայում ավելի արդյունավետ ու իրավական ճանապարհով ցույց կտանք այս ամենի քաղաքական, շինծու բնույթը»,- ասել է Քոչարյանը

Անդրադառնալով եղբորը ներկայացված մեղադրանքներին՝ Լևոն Քոչարյանը նշել է, որ Սեդրակը շատ վաղ հասակից է սկսել զբաղվել բիզնես գործունեությամբ, ու սա ինչ-որ մեկ դրվագ չէ:

«Խոսքը մոտ 20 տարվա մասին է՝ դեռևս 2-րդ կուրսից սկսած։ Եվ այս մասով, ինչպես բազմիցս ասել եմ, որ բոլոր հարցերը քննարկման առարկա են լինելու դատարանում, այս մասով քննություն է գնում։ Հարկ եմ համարում ևս մեկ անգամ շեշտել, որ չկա որևէ բիզնես գործունեություն, որի սկիզբը կամ ընթացքն ապօրինի է, և չկա որևէ մեկ դրամ գումար, որի օրինական բացատրությունը չլինի»,– մանրամասնել է նա։

Միաժամանակ ընդդիմադիր պատգամավորը չի հրապարակել Սեդրակ Քոչարյանին ֆինանսական աջակցություն ցուցաբերած անձի անունը և չի հայտնել գումարի չափը։ Քոչարյանը հիշեցրել է իրենց փաստաբան Արամ Օրբելյանի ավելի վաղ արած հայտարարությունը՝ նշելով, որ նա պետք է Սեդրակ Քոչարյանի հետ քննարկի՝ արդյոք նպատակահարմար է մինչև դատական նիստը հրապարակել քննության ենթակա այդ տեղեկությունները։ Նա նաև հայտնել է, որ ֆինանսավորման աղբյուրների վերաբերյալ տեղեկություններն ու դրանց հիմնավորումները ներկայացվելու են դատական նիստի ընթացքում։