Սյունիքի մարզի Շաքի բնակավայրում ՀՀ պետական սահմանն ապօրինի հատած ադրբեջանցի զինծառայողի ներխուժման և տեղի բնակչուհուն վիրավորելու դեպքից հետո գյուղացիները Factor TV-ի հետ զրույցում պատմում են միջադեպի մանրամասները:
Շաքիի բնակիչներից մեկը լրագրողների հետ զրույցում հայտնել է, որ սահմանի խախտման մասին իրեն դեռ չորս օր առաջ զգուշացրել էին Ռազմական ոստիկանության ծառայողները, երբ ինքը գիշերային հերթափոխով շինանյութ (հող և ավազ) էր տեղափոխում մարտական հենակետեր՝ ամրաշինական աշխատանքների համար:
«Ինձ զգուշացրել էին, որ սահմանախախտում է եղել, փախած թուրքեր կան, զգույշ եղիր։ Սկզբում ասել էին՝ չորս հոգի են, բայց հետո պարզվեց, որ մեկ հոգի է եղել»,- պատմեց բնակիչը՝ նշելով, որ իրավապահները հսկողություն էին սահմանել մայրուղու վրա:
Factor.am-ը կատարվածի վերաբերյալ բնակչի ներկայացրած տեղեկությունների առնչությամբ պարզաբանում ստանալու նպատակով դիմել է ԱԱԾ։ Պատասխան ստանալուն պես՝ կհրապարակենք։
Անդրադառնալով դեպքին՝ գյուղացին նշել է, որ ադրբեջանցին մտել է համագյուղացու տուն և հրազենով վիրավորել կնոջ ոտքը: Կրակոցից հետո զինված ներխուժողը դիմել է փախուստի՝ անցնելով բանջարանոցների ու այգիների միջով:
Ըստ բնակչի՝ տեղի որսորդներն ու գյուղի երիտասարդներն արյան հետքերով անմիջապես հետապնդել են նրան: Զինծառայողին, ի վերջո, հայտնաբերել և վնասազերծել են գյուղի տներից մեկի անասնագոմում։
Բնակչի խոսքով՝ գյուղում իրավիճակն այժմ հանգիստ է։
Նշենք, որ Դատախազությունը տեղեկացրել էր՝ 2026 թվականի հոկտեմբերի 1-ին Սյունիքի մարզի Սիսիան համայնքի Շաքի բնակավայրում արձանագրված դեպքով նախաձեռնվել է քրեական վարույթ՝ զենքի գործադրմամբ առողջությանը ծանր վնաս հասցնելու, հրազենի ապօրինի շրջանառության և բնակարանի անձեռնմխելիությունը խախտելու հատկանիշներով։
Ավելի ուշ ևս մեկ վարույթ է նախաձեռնվել՝ պետական սահմանն ապօրինի հատելու և հրազենի մաքսանենգության հատկանիշներով, որը միացվել է արդեն իսկ առկա վարույթին։ Ադրբեջանցի զինծառայողին կալանավորելու վերաբերյալ միջնորդություն է ներկայացվել դատարան։
Մանրամասները՝ տեսանյութում։
Նարեկ Կիրակոսյան