Վարչապետ Նիկոլ Փաշինյանը ներկա է գտնվել «Յուվենտուս» հայաստանյան ակադեմիայի և «Freedom Arena» մարզադաշտի պաշտոնական բացման արարողությանը։
Նիկոլ Փաշինյանը շրջել է նորաբաց ակադեմիայում և մարզահամալիրում, ծանոթացել ստեղծված մարզական ենթակառուցվածքներին ու պայմաններին, որոնք ուղղված են Հայաստանում ֆուտբոլի զարգացմանը:
Մանրամասներ են ներկայացվել կատարված ներդրումների և իրականացված շինարարական աշխատանքների վերաբերյալ: Ըստ այդմ՝ շին. աշխատանքները մեկնարկել են 2025թ., կատարված շուրջ 20 մլն դոլարի ներդրման արդյունքում կառուցվել է երկու ժամանակակից մարզաբազա Երևանում, իսկ երրորդի կառուցման մեկնարկը տրվում է այսօր՝ Կոտայքի մարզի Նոր Հաճն համայնքի «Bosco Welltown» թաղամասում։
Բազմաֆունկցիոնալ «Freedom Arena»-ն համապատասխանում է ՈՒԵՖԱ-ի 2-րդ կատեգորիայի ստանդարտներին, որտեղ բացի ֆուտբոլային հանդիպումներից, հնարավոր կլինի անցկացնել սպորտային և այլ միջոցառումներ։ Մարզադաշտն ունի շուրջ 2000 նստատեղ։
Սպորտային համալիրի տարածքում կգործի նաև Հայաստանում առաջին մասնագիտացված սպորտային-բժշկական կլինիկան և վերականգնողական կենտրոնը՝ Medicina Dello Sport:
Ավանի մարզաբազայում առկա են կացարաններ՝ նախատեսված մարզիչների և դրա կարիքն ունեցող երեխաների համար, մարզասրահ, բժշկական հետազոտությունների և վերականգնողական գոտիներ, նորագույն տեխնոլոգիաներով հագեցած վերլուծության սենյակ, խանութ-սրահ և այլ ենթակառուցվածքներ։ Շինությունը կառուցվել է ժամանակակից «կանաչ շենքերի» ստանդարտներին համապատասխան՝ կիրառելով արևային պանելներ, ջրախնայող համակարգեր, հակաալերգիկ նյութեր և ներկեր։
Մարզաբազաներում կառուցվել են բնական և արհեստական խոտածածկով բարձրորակ խաղադաշտեր, օրգանական նյութերով լցոնված արհեստական խոտածածկով դաշտեր՝ փոքր տարիքի երեխաների համար, ինչպես նաև փակ խաղադաշտ։
ՀՀ վարչապետի աշխատակազմ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: