Ford-ի գլխավոր տնօրեն Ջիմ Ֆարլին հայտարարել է, որ Եվրոպայի համար արդեն չափազանց ուշ է զսպել չինական ավտոարտադրողների արագ ընդլայնումը, մինչդեռ ԱՄՆ-ը դեռ ժամանակ ունի շուկայի պաշտպանության հարցում կշռադատված որոշումներ ընդունելու համար, հաղորդում է CNBC-ն։
GlobalData-ի փորձագետների տվյալներով՝ 2020–2025 թվականներին չինական ավտոմոբիլային ապրանքանիշերի մասնաբաժինը համաշխարհային շուկայում աճել է գրեթե 70%-ով։ Dataforce-ի տվյալներով՝ Եվրոպայում նրանց շուկայական մասնաբաժինը 2020 թվականի գրեթե զրոյական մակարդակից մինչև օգոստոս հասել է 12%-ի։
Ford-ի ղեկավարը նշել է, որ ԱՄՆ-ի համար կարևոր է չկրկնել Եվրոպայի փորձը և մանրակրկիտ գնահատել չինական ընկերությունների մուտքն ամերիկյան շուկա։
«Ես հետևում եմ, թե ինչ է այժմ տեղի ունենում Եվրոպայում, որտեղ դա չարվեց, և հիմա նրանք իսկապես ստիպված են լուծել այդ խնդիրը, բայց արդեն չափազանց ուշ է», — ընդգծել է Ֆարլին։
Չինական ավտոարտադրողների հետ աճող մրցակցության պայմաններում Ford-ը երկակի ռազմավարություն է կիրառում՝ մի կողմից փորձելով դիմակայել չինական ապրանքանիշերի ընդլայնմանը, մյուս կողմից՝ համագործակցելով նրանց հետ։
Ford-ը և Geely-ն նախատեսում են հաջորդ տարվա սկզբին Իսպանիայում գտնվող գործարանում սկսել էլեկտրամոբիլների համատեղ արտադրություն։
Ֆարլիի խոսքով՝ Ford-ը մտադիր է զարգացնել համագործակցությունը չինական ընկերությունների հետ այն ոլորտներում, որտեղ սեփական մտավոր սեփականության պակաս ունի՝ Եվրոպայի և Հարավարևելյան Ասիայի շուկաներում կապիտալի օգտագործման արդյունավետությունը բարձրացնելու նպատակով։