Շախմատի միջազգային ֆեդերացիայի (ՖԻԴԵ) նորընտիր նախագահ Թիմուր Տուրլովի առաջին պաշտոնական այցը կլինի Հայաստան։ Տեղեկությունը հայտնում է Հայաստանի շախմատի ֆեդերացիան։
Ֆեդերացիայից տեղեկացնում են, որ սեպտեմբերի 29–ին Ծաղկաձորում կմեկնարկի 2026 թվականի դպրոցականների աշխարհի թիմային առաջնության Եվրոպական մայրցամաքային փուլը և բացման արարողության ընթացքում հանդես կգա նաև ՖԻԴԵ-ի նախագահ, Շախմատի դպրոցականների միջազգային ֆեդերացիայի նախագահ Թիմուր Տուրլովը։
Այդ օրը Տուրլովը հանդիպում կունենա նաև Հայկական պետական մանկավարժական համալսարանին կից գործող «Շախմատ» գիտահետազոտական ինստիտուտի անձնակազմի հետ։
Նշվում է, որ հանդիպման շրջանակում կքննարկվեն շախմատի զարգացմանը, կրթական ծրագրերին և միջազգային համագործակցությանը վերաբերող կարևոր հարցեր։
Հիշեցնենք, որ Թիմուր Տուրլովը Շախմատի միջազգային ֆեդերացիայի (ՖԻԴԵ) նախագահ է ընտրվել սեպտեմբերի 26–ին Ուզբեկստանի Սամարղանդ քաղաքում՝ Շախմատի 46-րդ համաշխարհային օլիմպիադայի շրջանակում տեղի ունեցած ընտրությունների ժամանակ։
Ընտրություններին մասնակցել են աշխարհի 196 ազգային շախմատի ֆեդերացիաների ներկայացուցիչներ։ 38-ամյա Թիմուր Տուրլովը դարձել է ՖԻԴԵ-ի պատմության մեջ երկրորդ ամենաերիտասարդ նախագահը։