Սեպտեմբերի 17-ին գյումրեցի լրագրող Արամ Դավթյանը ֆեյսբուքյան իր էջում ահազանգել էր, որ 8-րդ զինվորական թաղամասում տեղակայված շաուրմայի կետի խոհարարը դաժան ծեծի է ենթարկել շան ձագին։ Անօգնական կենդանին փորձել է փախչել, սակայն աշխատակիցը թույլ չի տվել հեռանալ, շարունակել է տանջել նրան։
Արամ Դավթյանը իր գրառմամբ հրավիրել էր իրավապահների ուշադրությունը՝ ակնկալելով ընթացք տալ ու պարզել դեպքի հանգամանքները։
Aravot.am-ի տեղեկություններով, ոստիկանության Մուշ բաժնի աշխատակիցները, ֆեյսբուքյան գրառումը ընդունելով որպես հանցագործության մասին հաղորդում, անմիջապես գնացել են դրա հետքերով։
Հատուկ կարևոր գործերով համայնքային ոստիկան Մինասյանը զեկուցագիր է ներկայացրել, որ «Ֆեյսբուք» սոցիալական ցանցի մշտադիտարկման արդյունքում հայտնաբերել է «Գյումրիում շաուրմայի կետի խոհարարը ծեծել է անօգնական շան ձագին» վերնագրով հրապարակում, որտեղ հեղինակը նկարագրել է, թե ինչպես է շաուրմայի կետի խոհարարը դաժանորեն ծեծել անպաշտպան կենդանուն՝ տանջելով նրան, չթողնելով հեռանալ։
Ոստիկանության կատարած ստուգումների արդյունքում Գյումրու 8-րդ զինվորական թաղամասում գտնվող թիվ 19 ռուսական դպրոցի ուսուցչուհիներից մեկը հայտնել է, որ սեպտեմբերի 17-ին՝ ժամը 16․20 րոպեի սահմաններում, գտնվելով կանգառում՝ լսել է շան ձագի վնգստոց, քայլել է ձայնի ուղղությամբ և նկատել է, որ նշված թաղամասի դիմաց գտնվող արագ սննդի կետերից մեկի դիմաց (սննդի կետի անվանումը չենք գրում, որպեսզի գովազդ չդիտարկվի) մի տղամարդ ոտքով հարվածում է շան ձագին։ Ոստիկանները պարզել են, որ նա 1962 թվականին ծնված Վ․Ս․-ն է։
Ոստիկան Մինասյանը կենդանիների նկատմամբ դաժան վերաբերմունք ցուցաբերելու կասկածանքով հանցանքի մասին հաղորդում է ներկայացրել, կազմված փաստաթղթերն ուղարկվել են Շիրակի մարզային քննչական վարչություն։
Նշենք, որ կենդանիների նկատմամբ դաժան վերաբերմունք ցուցաբերելը քրեորեն պատժելի է, ՀՀ Քրեական օրենսգրքի 307-րդ հոդվածը նախատեսում է տուգանք՝ ամսական եկամտի առավելագույնը քսանապատիկի չափով, հանրային աշխատանք՝ 80-150 ժամ տևողությամբ, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ առավելագույնը երկու տարի ժամկետով։
Նունե ԱՐԵՎՇԱՏՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: