Ճանապարհային երթևեկության կանոնների մի շարք խախտումների համար նախատեսվում է խստացնել վարչական պատասխանատվությունը։ ՆԳՆ-ի մշակած օրենսդրական նախագծով առաջարկվում է տուգանքներ սահմանել կամ բարձրացնել, որոշ դեպքերում նաև կկիրառվեն տուգանային միավորներ։ Համապատասխան նախագիծը տեղադրված է Իրավական ակտերի նախագծերի հրապարակման միասնական կայքում։
Փոփոխություններից մեկը վերաբերում է «Մուտքն արգելվում է» կամ «Բեռնատար ավտոմոբիլների երթևեկությունն արգելվում է» ճանապարհային նշանների պահանջները չկատարելուն։ Դրա համար նախատեսվում է 10 հազար դրամ տուգանք և 2 տուգանային միավոր։
10 հազար դրամ տուգանք և 1 տուգանային միավոր կարող է սահմանվել նաև այն դեպքում, եթե վարորդը տրանսպորտային միջոցը տեղակայի երթևեկելի մասի երկրորդ կամ ավելի շարքում։
Խստացվում է նաև ընդհանուր օգտագործման տրանսպորտային միջոցների կանգառի կետի տարածքում կանգառ կատարելու կամ կայանելու, ինչպես նաև երթևեկելի մասի եզրին ոչ զուգահեռ կայանելու համար նախատեսված պատասխանատվությունը։ Գործող 5 հազար դրամ տուգանքի փոխարեն առաջարկվում է սահմանել 10 հազար դրամ տուգանք և 1 տուգանային միավոր։
Առանձին փոփոխություն նախատեսվում է մինչև 12 տարեկան երեխաների փոխադրման կանոնների խախտման համար։ Գործող 5 հազար դրամ տուգանքի փոխարեն առաջարկվում է սահմանել 10 հազար դրամ տուգանք և 1 տուգանային միավոր։
ՆԳՆ-ն հիմնավորման մեջ նշում է, որ 2025 թվականին առանց մանկական պահող հարմարանքների երեխաների փոխադրման հետ կապված արձանագրվել է 11 հազար 198 իրավախախտում՝ 2024 թվականի համեմատ 5747-ով ավելի։
Միաժամանակ, 2025 թվականին մինչև 12 տարեկանների մասնակցությամբ գրանցվել է 404 ճանապարհատրանսպորտային պատահար, որոնց հետևանքով 11 մարդ զոհվել է, 487-ը՝ վիրավորվել։
Փաթեթով առաջարկվում է նաև փոփոխություն կատարել վարորդների՝ թմրանյութ օգտագործած վիճակում գտնվելու փաստի ստուգման կարգում։ Գործող կարգավորմամբ նման կասկածի դեպքում ստուգումն իրականացվում է արյան կամ մեզի միջոցով՝ բժշկական կազմակերպություններում։ Առաջարկվում է հնարավորություն տալ տեխնիկական միջոցներով ստուգելու նաև թքի մեջ թմրամիջոցի կամ հոգեմետ նյութի առկայությունը։
Նախագծի հիմնավորման համաձայն՝ այս փոփոխությունը պետք է հնարավորություն տա առավել գործուն եղանակով կանխարգելել թմրանյութ օգտագործած վիճակում մեքենա վարելու դեպքերը։
Օրենսդրական փաթեթով նախատեսվում է նաև ոստիկանությանը վերապահել մասնավոր պահնորդական գործունեության ոլորտում մի շարք վարչական իրավախախտումների վերաբերյալ գործերը քննելու և որոշումներ կայացնելու իրավասությունը։
Նախագիծը հարթակում կմնա մինչև հոկտեմբերի 14-ը, ապա կներկայացվի Կառավարության նիստում, իսկ հավանություն ստանալու դեպքում՝ խորհրդարանում։
Արփի Հակոբյան