Երևանի Ծիծեռնակաբերդի խճուղում տեղակայված «Ծիծեռնակաբերդ» 110/6 ենթակայանում սեպտեմբերի 27-ին բռնկված հրդեհի կապակցությամբ հանցագործության մասին հաղորդում է ներկայացվել, հայտնում է ՀԷՑ-ը։
«Սեպտեմբերի 27-ին՝ ժամը 17։07-ին, ՆԳՆ 112 օպերատիվ կառավարման կենտրոն ահազանգ է ստացվել, որ Երևան քաղաքի Ծիծեռնակաբերդի խճուղում հրդեհ է բռնկվել «Ծիծեռնակաբերդ» 110/6 կՎ ենթակայանում։ Դեպքի վայրում են նաև «Հայաստանի էլեկտրական ցանցեր» ՓԲԸ-ի աշխատակիցները։
Ենթակայանում բռնկված հրդեհի պատճառներն ուսումնասիրվում են։ Հաղորդում է ներկայացվել հանցագործության մասին»,-ասվում է գրառման մեջ:
Հրդեհը մարվել է հրդեհը ժամը 21:10-ին:
ՆԳՆ մամուլի քրտուղար Նարեկ Սարգսյանը ասել էր, որ էլեկտրական բաշխիչ կայանի տրանսֆորմատորներից մեկն է բռնկվել, որում եղել է 25-30 տոննա յուղ։ Հրշեջներին հաջողվել է կանխել կրակի տարածումը դեպի մյուս տրանսֆորմատորներ և խոտածածկ տարածք, հայտնում է Panorama.am-ը:
«Հոսպիտալացվել է ծխահարված հրշեջներից մեկը, մյուսը բուժօգնություն է ստանում»,-ասել էր Սարգսյանը։
Նա նաև նշել է, որ հրդեհի բռնկման վերաբերյալ տարբեր վարկածներ կան, և դեպքի առնչությամբ քննություն է իրականացվելու։
Ժամը 22:30-ի դրությամբ՝ հրդեհի հետևանքով հոսանքազրկված բոլոր հասցեներում էլեկտրամատակարարումը վերականգնվել է, բացառությամբ մի քանի բազմաբնակարան շենքերի (մի քանի հարյուր բաժանորդ), որտեղ էլեկտրաէներգիայի մատակարարումը կվերականգնվի առաջիկա 2-3 ժամերի ընթացքում։ Այդ մասին ֆեյսբուքի իր էջում գրել է «Հայաստանի էլեկտրական ցանցեր» ընկերության ժամանակավոր կառավարիչ Ռոմանոս Պետրոսյանը։
ՀԷՑ Անվտանգության և վերահսկողության տնօրենության կողմից արդեն մեկնարկել և այս պահին իրականացվում է ծառայողական քննություն՝ հրդեհի պատճառահետևանքային կապն ու հանգամանքները պարզելու նպատակով։
Հոսանքազրկվել էին Պուշկինի փողոցը, Եկմալյան փողոցը, Տերյան փողոցը, Պապ թագավոր փողոցը, Սարյան փողոցը, Բուզանդի փողոցը, Փարպեցու փողոցը, Ֆրիկի փողոցը, Թումանյանի փողոցը, Արամի փողոցը, Հյուսիսային պողոտան, Ծիծեռնակաբերդի խճուղին, Քըրք Քըրքորյան փողոցը և Մոնթե Մելքոնյան փողոցը։