ԱՄՆ պետքարտուղար Մարկո Ռուբիոն հոկտեմբերին կայցելի Ուզբեկստան՝ գլխավորելով խոշոր գործարար պատվիրակություն։ Սամարղանդում նա կմասնակցի «C5+1» ձևաչափով հանդիպմանը և բանակցություններ կվարի առևտրի, ներդրումների և տնտեսական համագործակցության շուրջ։
Առաջիկա այցի մասին հայտարարել է Հարավային և Կենտրոնական Ասիայի հարցերով ԱՄՆ հատուկ ներկայացուցիչ Սերխիո Գորը։ Նրա խոսքով՝ պատվիրակության կազմում կընդգրկվեն ավելի քան 100 ամերիկյան ընկերությունների ներկայացուցիչներ։
Այցի հիմնական նպատակն է ընդլայնել առևտրային և ներդրումային հնարավորությունները ԱՄՆ-ի և Ուզբեկստանի միջև։ Ամերիկյան կողմը նաև մտադիր է քննարկել տնտեսական արդիականացմանն ուղղված աջակցության և Կենտրոնական Ասիայում գործարար կապերի զարգացման հարցերը։
Այցի շրջանակում Ռուբիոն կմասնակցի «C5+1» ձևաչափով նախարարական հանդիպմանը՝ Ղազախստանի, Ղրղզստանի, Տաջիկստանի, Թուրքմենստանի և Ուզբեկստանի արտաքին գործերի նախարարների մասնակցությամբ։
Ակնկալվում է, որ քննարկումները կվերաբերեն տարածաշրջանային տնտեսական կապակցվածությանը, էներգետիկ անվտանգությանը և Կենտրոնական Ասիայի երկրների ու Միացյալ Նահանգների համար ընդհանուր նշանակություն ունեցող այլ առաջնահերթություններին։
Բացի այդ, ԱՄՆ պետքարտուղարը հանդիպումներ կունենա Ուզբեկստանի ղեկավարության և տարածաշրջանի իր գործընկերների հետ։ Հատուկ ուշադրություն կդարձվի առևտրի ծավալների ավելացմանը, մասնավոր ներդրումների ներգրավմանը և տնտեսական գործընկերության հետագա զարգացմանը։