ՀՀ պաշտպանության նախարար Սուրեն Պապիկյանի ստուգայցերը ՊՆ զորամասեր շարունակվում են։
Սեպտեմբերի 23-ին պաշտպանական գերատեսչության ղեկավարը ՊՆ N զորամասում ուսումնական տագնապ է հայտարարել։ Դրա ընթացքում նա հետևել է անձնակազմի գործողություններին, ստուգել ստորաբաժանումների պատրաստվածության մակարդակը և սահմանված ժամկետում առաջադրված խնդիրների կատարման ընթացքը։
Սուրեն Պապիկյանն այցելել է նաև հանրապետության մարզերից մեկում կառուցվող ամրացված շրջան, որը շուտով պատրաստ է լինելու շահագործման հանձնվելուն։
Ստուգայցերի ընթացքում նախարարը ծանոթացել է զորամասերում նոր ենթակառուցվածքների կառուցման աշխատանքների ընթացքին և հետևել զինծառայողների համար նախատեսված սննդի պատրաստման գործընթացին։
Պապիկյանը հանդիպել ու զրուցել է նաև 25-օրյա վարժական հավաքների մասնակիցների հետ։ Նա հետաքրքրվել է նրանց ծառայության պայմաններով, առօրյայով և պատրաստության ընթացքով։
Նախարարն առանձնազրույց է ունեցել նաև կարգապահական տարբեր խախտումներ թույլ տված զինծառայողների հետ։ Սուրեն Պապիկյանը նրանցից պահանջել և խնդրել է խստագույնս պահպանել զինվորական կարգապահությունը և հետագայում աչքի ընկնել միայն օրինակելի ծառայությամբ։