Վրաստանի և Ռուսաստանի միջև ապրանքաշրջանառությունը 2026 թվականի հունվար-օգոստոսին գերազանցել է 2 մլրդ դոլարը՝ նախորդ տարվա նույն ժամանակահատվածի համեմատ աճելով 19.1%-ով։ Այդ մասին են վկայում Վրաստանի ազգային վիճակագրական ծառայության տվյալները։
Վիճակագրական տվյալների համաձայն՝ հաշվետու ժամանակահատվածում Ռուսաստանից Վրաստան է ներմուծվել մոտ 1.5 մլրդ դոլարի ապրանք, ինչը 24.9%-ով ավելի է նախորդ տարվա նույն ժամանակահատվածի ցուցանիշից։ Վրաստանից Ռուսաստան արտահանումն աճել է 4.1%-ով՝ կազմելով 500.7 մլն դոլար։
Ռուսաստանը Վրաստանի խոշորագույն արտաքին առևտրային գործընկերների շարքում զբաղեցրել է երրորդ տեղը՝ 11.3% մասնաբաժնով։ Առաջին տեղերում են Թուրքիան՝ 2.25 մլրդ դոլարի ապրանքաշրջանառությամբ, և Չինաստանը՝ մոտ 2.04 մլրդ դոլարով։ Ընդհանուր առմամբ, Վրաստանի արտաքին առևտրաշրջանառությունը 2026 թվականի հունվար-օգոստոսին կազմել է 17.93 մլրդ դոլար՝ նախորդ տարվա նույն ժամանակահատվածի համեմատ աճելով 8.4%-ով։
Վրաստանի արտահանումն աճել է 22.1%-ով՝ հասնելով 5.42 մլրդ դոլարի, մինչդեռ ներմուծումն ավելացել է 3.4%-ով՝ հասնելով 12.5 մլրդ դոլարի։ Երկրի առևտրային հաշվեկշռի բացասական մնացորդը կազմել է 7.08 մլրդ դոլար կամ արտաքին առևտրաշրջանառության ընդհանուր ծավալի 39.5%-ը։
Վրաստանի 10 խոշորագույն առևտրային գործընկերներին բաժին է ընկել երկրի արտաքին առևտրի ընդհանուր ծավալի 65.7%-ը։ Թուրքիայից, Չինաստանից և Ռուսաստանից բացի, այդ երկրների թվում են ԱՄՆ-ն, Ադրբեջանը, Գերմանիան և Հայաստանը։