Մինչ Հայաստանի իշխանությունները զբաղված են ներքին քարոզչությամբ ու հանրությանը «խաղաղության» անուրջներ մատուցելով, Միացյալ Նահանգներում ընթանում են տարածաշրջանի ապագան վճռող բուն քննարկումները։ Նյու Յորքում մեկնարկած ՄԱԿ-ի Գլխավոր ասամբլեայի 81-րդ նստաշրջանի շրջանակում Թուրքիայի արտգործնախարար Հաքան Ֆիդանը բացահայտ խոսել է այն մասին, թե ինչպես են Անկարան ու Վաշինգտոնը համակարգում իրենց քայլերը Հարավային Կովկասում։
«Թուրք-ամերիկյան հարաբերությունները 100-ի շեմին» խորագրով քննարկման ժամանակ Ֆիդանը հայտարարել է, թե Թուրքիան և ԱՄՆ-ն «աջակցում են» Հայաստանի և Ադրբեջանի միջև ընթացող գործընթացին։ Թուրքական դիվանագիտության ղեկավարը չի թաքցրել, որ Անկարայի և Վաշինգտոնի միջև ձևավորված տանդեմը նպատակ ունի իրենց վերահսկողության տակ պահել ոչ միայն Կովկասը, այլև Սևծովյան տարածաշրջանը՝ դրանք վերածելով «համագործակցության հարթակի»։
Ուշագրավ է, որ Անկարան իր աշխարհաքաղաքական նկրտումներն առաջ մղելիս ապավինում է նաև անձնական դիվանագիտությանը։ Ֆիդանը հատուկ ընդգծել է, որ Ռեջեփ Թայիփ Էրդողանը մեծ հույսեր է կապում Դոնալդ Թրամփի հետ ունեցած հարաբերությունների հետ, ինչը, նրա համոզմամբ, թույլ է տալու ավելի խորացնել թուրք-ամերիկյան գործընկերությունը տարբեր տարածաշրջանային ճգնաժամերում՝ Բալկաններից մինչև Մերձավոր Արևելք ու Աֆրիկա։
Այս ամենի ֆոնին սեպտեմբերի 22-ին ՄԱԿ-ի ամբիոնից ելույթ է ունենալու Էրդողանը։ Ակնհայտ է, որ Թուրքիան, օգտվելով տարածաշրջանում ստեղծված ուժային անհավասարակշռությունից, Վաշինգտոնի հետ գործարքների միջոցով փորձում է վերջնականապես ամրապնդել իր տերությունն ու դիրքերը Հարավային Կովկասում։