Տնտեսագիտության Նոբելյան մրցանակակիր, աշխարհի առաջատար տնտեսագետ Աբհիջիթ Բաներջին ՀՀ վարչապետի հետ հանդիպման ժամանակ պատրաստակամություն է հայտնել օգնել Հայաստանին ավելի արդյունավետ առաջ մղելու բարեփոխումները
ԵՐԵՎԱՆ, 21 սեպտեմբերի․/Նովոստի–Արմենիա/․ Տնտեսագիտության Նոբելյան մրցանակակիր, աշխարհի առաջատար տնտեսագետ Աբհիջիթ Բաներջին երկուշաբթի ՀՀ վարչապետ Նիկոլ Փաշինյանի հետ հանդիպման ժամանակ պատրաստակամություն է հայտնել օգնել Հայաստանին ավելի արդյունավետ առաջ մղելու բարեփոխումները:
Ինչպես հայտնում է ՀՀ կառավարության մամուլի ծառայությունը, Փաշինյանը ողջունել է Բաներջիի այցը Հայաստան և կարևորել համագործակցությունը քաղաքականությունների մշակման, ծրագրերի ազդեցությունների գնահատման և այլ ուղղություններով։
Վարչապետը նշել է, որ ՀՀ Կառավարությունն իրականացնում է մեծածավալ բարեփոխումներ, որոնք ներառում են բոլոր ոլորտները։ Այդ առումով, Նիկոլ Փաշինյանը շեշտել է ՀՀ Կառավարության տարբեր մարմինների, Կենտրոնական բանկի և Աբհիջիթ Բաներջիի միջև ակտիվ երկխոսության և փորձի փոխանակման անհրաժեշտությունը։
Բաներջին հայտնել է հայ գործընկերների հետ համագործակցությունն ընդլայնելու պատրաստակամության մասին՝ նպաստելու բարեփոխումների ավելի արդյունավետ իրականացմանը:
Հանդիպման ընթացքում կողմերը նաև մտքեր են փոխանակել հետագա համագործակցության հարցերի շուրջ:
Աբհիջիթ Բաներջիի մասին
Աբհիջիթ Բաներջին հնդկական ծագումով ամերիկացի տնտեսագետ է, 2019 թվականի տնտեսագիտության Նոբելյան մրցանակակիր, զարգացման տնտեսագիտության և տնտեսական տեսության մասնագետ, Մասաչուսեթսի տեխնոլոգիական ինստիտուտի (MIT) պրոֆեսոր և աղքատության դեմ պայքարի ծրագրերի արդյունավետության գնահատմամբ զբաղվող Abdul Latif Jameel Poverty Action Lab (J-PAL) հետազոտական կենտրոնի հիմնադիրներից մեկը: