Մեքսիկայի դաշնային և տարածաշրջանային իշխանությունները Գուանախուատո նահանգի Սան Խոսե Իտուրբիդե մունիցիպալիտետում առգրավել են մոտ 59 մլն լիտր բենզին և դիզելային վառելիք: Այս մասին հայտնել է նահանգի կառավարությունը։
«Դաշնային և տարածաշրջանային իշխանությունները խուզարկություն են իրականացրել մի օբյեկտում, որտեղ հայտնաբերվել և առգրավվել է մոտ 59 մլն լիտր ածխաջրածնային վառելիք՝ դիզելային վառելիքին, սովորական և պրեմիում դասի բենզինին բնորոշ հատկություններով»:
Գործողությունն իրականացվել է Լա Ֆրագուա համայնքում՝ ածխաջրածինների պահեստավորման, բաշխման և դրանց հետ կապված այլ գործարքների առնչությամբ ենթադրյալ հանցագործությունների հետաքննության շրջանակում։ Խուզարկությունը թույլատրվել է դաշնային քրեական գործերով դատավորի կողմից և իրականացվել է դաշնային դատախազության աշխատակիցների կողմից՝ մասնագիտացված փորձագետների և նահանգային իշխանությունների մասնակցությամբ։
Զննության ընթացքում հայտնաբերվել և առգրավվել է վառելիքով լցված 10 տարա, երեք ավտոցիստեռն, դրա տեղափոխման համար օգտագործվող տարբեր տարաներ, ինչպես նաև հետաքննության առարկա հանգամանքների հետ կապված փաստաթղթեր։
«Հայտնաբերված արտադրանքի ծավալի և դրա շրջանառության հետ կապված ռիսկերի պատճառով դրա չափման, նույնականացման և հետագա գործողությունների աշխատանքները կշարունակվեն մասնագիտացված անձնակազմի և իրավասու մարմինների վերահսկողության ներքո», – ասվում է նահանգի կառավարության հաղորդագրության մեջ։
Իշխանությունները նշել են, որ ձեռնարկված միջոցառումներն ուղղված են վառելիքի արտահոսքերի, հրդեհների և այլ իրավիճակների կանխարգելմանը, որոնք կարող էին վտանգ ներկայացնել բնակչության, գույքի կամ շրջակա միջավայրի համար։
Առգրավված վառելիքի ծավալը համարժեք է մոտ 2000 հատ 30 տոննա տարողությամբ ավտոցիստեռնի բեռնվածությանը։ Գուանախուատոյի կառավարության տվյալներով՝ նախորդ երկու տարիների ընթացքում տարածաշրջանում իրականացված տարբեր գործողությունների շրջանակում ընդհանուր առմամբ առգրավվել է գրեթե ութ անգամ պակաս՝ մոտ 7.9 մլն լիտր ածխաջրածին և դրանց ածանցյալներ։