Ազգային ժողովում կառավարության հետ հարցուպատասխանի ժամանակ բանավեճ ծավալվեց ընդդիմադիր «Հայաստան» խմբակցության պատգամավոր Գեղամ Մանուկյանի և վարչապետ Նիկոլ Փաշինյանի միջև։
Մանուկյանն իր ելույթում իշխանությանը մեղադրեց Ալմա-Աթայի հռչակագիրը միակողմանի զիջումների «փրկօղակ» դարձնելու և սահմանազատման գործընթացում ԽՍՀՄ ԶՈՒ Գլխավոր շտաբի քարտեզների իրավական ամրագրումը չապահովելու մեջ։
Պատգամավորը պնդեց, որ Ադրբեջանը քարտեզները կիրառում է միայն իրեն ձեռնտու հատվածներում, օրինակ՝ Կիրանցում, մինչդեռ հայկական կողմը չի կարողանում հասնել Բերքաբերի օկուպացված տարածքներից ադրբեջանական զորքերի դուրսբերմանը։
Արձագանքելով՝ Նիկոլ Փաշինյանը հերքեց զիջումների մասին պնդումները՝ հայտարարելով, որ իրենց զիջումների թիվը «զրո» է, իսկ սահմանազատումն իրականացվում է քայլ առ քայլ՝ կանոնակարգով և հստակեցված հիմքերով։
Անդրադառնալով ապօրինի գույքի բռնագանձման թեմային՝ Փաշինյանը հայտարարեց.
«ՀՀ այն քաղաքացիները, ովքեր համարում են, որ Ռոբերտ Քոչարյանի և նրա ընտանիքի մի քանի հարյուր միլիոն դոլարի հասնող սեփականությունն օրինական է, ես ուղիղ, առանց սեթևեթանքի, կոչ եմ անում դուրս գալ և հեղափոխություն անել: Որովհետև մեր քաղաքական կամքն այն է, որ Քոչարյանենցից ապօրինի ձեռք բերված նույնիսկ կոշիկը վերադարձնելու ենք պետությանը»։
Գեղամ Մանուկյանն իր արձագանքում նշեց, որ «Ռոբերտ Քոչարյանի կոշիկով հայրենիք է ազատագրվել», և ընդգծեց, որ Փաշինյանը դատարան չէ՝ որոշելու, թե ում գույքն է օրինական։
Փաշինյանն էլ հակադարձեց, որ սահմանազատման հարցում «դեմ տալու ժանրն այլևս անցյալում է», իսկ «ազատագրում» անվան տակ տեղի է ունեցել Հայաստանի ու Ղարաբաղի թալան։
Նա նաև հավելեց, որ դատարանների արդար գործելը հենց ընդդիմության շահերից է բխում, հակառակ դեպքում «ժողովուրդը դատարանը մի կողմ կդնի և անձամբ կգա իրեն պատկանողը հետ վերցնելու»։
Մանրամասները՝ տեսանյութում։
Անի Թամրազյան