Հասարակություն
16.09.2026 | 12:00
Պետական վերահսկողական ծառայության ուսումնասիրությամբ պարզվել է, որ 100 տոկոս պետական սեփականություն հանդիսացող «Նաիրիտ 2» ՓԲԸ-ի գույքի հարկադիր իրացման գործընթացում թույլ են տրվել խախտումներ, ինչի հետևանքով 420.8 մլն դրամ գնահատված գույքը աճուրդում վաճառվել է 167.8 մլն դրամով՝ շուրջ 60 տոկոս ցածր գնով։ Դեպքի առթիվ Գլխավոր դատախազությունում նախաձեռնվել է քրեական վարույթ։
«Պաշտոնեական լիազորությունների չարաշահմամբ «Նաիրիտ 2»-ի գույքն իրացվել է գնահատված արժեքից շուրջ 60 տոկոս ցածր գնով
Պետական վերահսկողական ծառայության վերահսկողությամբ ուսումնասիրվել է ՀՀ արդարադատության նախարարության հարկադիր կատարումն ապահովող ծառայության իրականացրած գույքի հարկադիր իրացման գործընթացի օրինականությունը։
Վերահսկողությամբ պարզվել է, որ 2025 թվականին 100 տոկոս պետական սեփականություն հանդիսացող «Նաիրիտ 2» ՓԲ ընկերության՝ 420.8 մլն դրամ գնահատված շուկայական արժեքով գույքի իրացման ընթացքում, սնանկության հիմքերի առկայության պայմաններում, կատարողական վարույթը կասեցնելու մասին որոշումը և ընկերությանը 90-օրյա ժամկետում սնանկության դատարան դիմելու առաջարկն ուղարկվել են սխալ հասցեով։ Արդյունքում ընկերությունը զրկվել է օրենքով նախատեսված գործողությունները պատշաճ ժամկետում իրականացնելու հնարավորությունից։
Բացի այդ, հարկադիր էլեկտրոնային աճուրդի հրապարակային ծանուցման մեջ ներառվել են իրականությանը չհամապատասխանող տեղեկություններ՝ գույքի գրավադրված լինելու և 6.07 մլրդ դրամի պարտավորությունների նոր սեփականատիրոջը փոխանցվելու վերաբերյալ։
Պաշտոնեական լիազորությունների չարաշահման և սակարկությունների կարգի խախտման արդյունքում գույքի նկատմամբ սահմանափակումների վերաբերյալ ոչ ամբողջական տեղեկատվությունը սահմանափակել է այլ անձանց մասնակցության իրական հնարավորությունը, և գույքն աճուրդում իրացվել է շուրջ 250․0 մլն դրամով ցածր՝ 167.8 մլն դրամ գնով։
Փաստվող դեպքի առթիվ հանցանքի մասին հաղորդում է ներկայացվել Գլխավոր դատախազություն․ նախաձեռնվել է քրեական վարույթ»,- ասված է Պետական վերահսկողական ծառայության տարածած հաղորդագրությունում։