Օրեր շարունակ առանց քնի մնալը կարող է կյանքի համար վտանգավոր լինել։ Այս մասին զգուշացրել է բժիշկ Էդուարդ Էստիվիլը՝ գրել է «El Confidencial» պարբերականը։
Էստիվիլն ընդգծել է, որ նույնիսկ մեկ անքուն գիշերը կարող է հանգեցնել հոգնածության, դյուրագրգռության և կենտրոնանալու դժվարության։
48-ից 72 ժամ անց մարդու վիճակը զգալիորեն վատթարանում է՝ ի հայտ են գալիս ապակողմնորոշման, հուզական անկայունության և տրամաբանական մտածողության խանգարման նշաններ։ Որոշ դեպքերում առաջանում են հալյուցինացիաներ և գիտակցության կարճատև կորուստներ (ընդամենը մի քանի վայրկյան տևողությամբ), որոնք անհատը կարող է նույնիսկ չնկատել՝ կարծելով, թե լիովին արթուն է։
Մասնագետի խոսքով՝ քնի խիստ պակասը հանգեցնում է ապակողմնորոշման և խաթարում օրգանիզմի համակարգերի աշխատանքը։ Հատկապես վտանգավոր հետևանքներից են երիկամային անբավարարության հավանականությունը և ճանաչողական գործառույթների աստիճանական անկումը։
Երբ բժշկին հարցրել են, թե արդյոք մարդը կարող է մահանալ քնի պակասից, նա դրական պատասխան է տվել։