Թուրքիայի ԱԳ նախարար Հաքան Ֆիդանը սեպտեմբերի 15-16-ին այցելելու է Ադրբեջան, որտեղ նախատեսված հանդիպումների ընթացքում անդրադառնալու է նաև Հայաստան-Ադրբեջան հարաբերություններին։
Այցի շրջանակում Ֆիդանը բանակցություններ է վարելու Ադրբեջանի արտաքին գործերի նախարար Ջեյհուն Բայրամովի հետ։ Քննարկումները նախատեսված են ինչպես երկկողմ, այնպես էլ ընդլայնված ձևաչափերով։ Թուրքիայի ԱԳ նախարարը հանդիպելու է նաև Ադրբեջանի պաշտպանության նախարար Զաքիր Հասանովի հետ, հայտնում է Panorama.am-ն «Անադոլու» գործակալության վրա հղումով:
Նախատեսվում է նաև Հաքան Ֆիդանի հանդիպումն Ադրբեջանի նախագահ Իլհամ Ալիևի հետ։
Ակնկալվում է, որ այցի ընթացքում Թուրքիայի արտաքին գործերի նախարարը կշեշտի «Ադրբեջանի և Հայաստանի միջև խաղաղության պատմական հնարավորությունը և կվերահաստատի Անկարայի աջակցությունը երկու կողմերի միջև բարիդրացիական հարաբերությունների զարգացմանը»։
Օգոստոսի 8-ին ԱՄՆ-ն, Հայաստանը և Ադրբեջանը հանդես են եկել համատեղ հայտարարությամբ 2025 թվականի օգոստոսի 8-ին Սպիտակ տանը անցկացված Խաղաղության գագաթնաժողովի առաջին տարեդարձի առթիվ: Նշվում է, որ համատեղ հռչակագիրը, Միացյալ Նահանգների աջակցությամբ, Հայաստանի և Ադրբեջանի համար ապահովել է հստակ ճանապարհային քարտեզ՝ խաղաղությունն ամրապնդելու, բարգավաճման հասնելու և գործընկերությունը խորացնելու համար։ Այս համարձակ առաջնորդների հանդիպումից ի վեր մեկ տարվա ընթացքում երկրները շարունակական հաջողության համար հիմքեր են ստեղծել։