Վաշինգտոնը պետք է դադարեցնի ցանկացած օգնություն Կիևին։ Նման հայտարարություն է արել ՌԴ նախագահի օգնական Յուրի Ուշակովը՝ պատասխանելով լրագրող Պավել Զարուբինի հարցին:
Նրա խոսքով` սեպտեմբերի 8-ին Ռուսաստանի նախագահ Վլադիմիր Պուտինի և ԱՄՆ նախագահ Դոնալդ Թրամփի միջև կայացած հեռախոսազրույցի շրջանակում քննարկվել են խաղաղ կարգավորման հասնելու հարցեր, ինչպես նաև դրա առաջխաղացման հնարավոր ուղիներ:
Ռուսաստանի նախագահի օգնականը նշել է, որ Դոնալդ Թրամփի նախագահության շրջանում ԱՄՆ-ի կողմից Ուկրաինային տրամադրվող աջակցության ծավալը զգալիորեն կրճատվել է:
Ուշակովը նաև հայտարարել է, որ Ուկրաինայի հարցով եռակողմ բանակցությունները վերսկսվելու դեպքում Աբու Դաբին կարող է լինել հանդիպման հնարավոր վայրը։ Նա նշել է, որ ներկայում ուկրաինական կողմի հետ որոշակի մակարդակի շփում է պահպանվում։
Ավելի վաղ՝ սեպտեմբերի 7-ին, ԱՄՆ նախագահի հատուկ բանագնաց Սթիվ Ուիտկոֆը Մոսկվա և Կիև կատարած այցերի արդյունքներով հայտնել էր ուկրաինական հակամարտության կարգավորման հարցում զգալի առաջընթացի մասին, այդ թվում՝ նոր եռակողմ բանակցությունների նախապատրաստման մասով։
Ավելի ուշ նա հաղորդեց, որ բանակցությունների վերսկսման ճանապարհային քարտեզ կարող է մշակվել առաջիկա շաբաթներին: Ուիտկոֆի խոսքով` որոշումը կարող է ձեռնտու լինել երկու երկրներին։
Ռուսաստանի նախագահի մամուլի քարտուղար Դմիտրի Պեսկովն իր հերթին հայտարարել է, որ ներկա պահին Ուկրաինայում հակամարտության կարգավորման ճանապարհային քարտեզ չկա, առկա է ընդհանուր քաղաքական նախաձեռնություն՝ ուղղված եռակողմ բանակցային ձևաչափի վերականգնմանը: