Քաղաքականություն
11.02.2026 | 15:28
Մոսկվան հույս ունի շարունակել համագործակցությունը Երևանի հետ ինտեգրացիոն նախագծերի շուրջ, մասնավորապես, Եվրասիական տնտեսական միության (ԵՏՄ) շրջանակում։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը՝ մեկնաբանելով ԱՄՆ փոխնախագահ Ջեյ Դի Վենսի Հարավային Կովկաս այցը և խոշոր համատեղ նախագծերի ծրագրերի մասին հայտարարությունները, գրում է ՏԱՍՍ-ը։
«Մեզ Հայաստանի հետ միավորում են ինտեգրացիոն նախագծերը։ Դժվար թե որևէ մեկը վիճարկի ԵՏՄ-ի դերն այս երկրի տնտեսական զարգացման բարձր տեմպերի պահպանման գործում. դրա դերը ակնհայտ է։ Եվ մենք հույս ունենք, որ մեր համագործակցությունը կշարունակվի»,- ասել է նա։
Կրեմլի խոսնակը նաև նշել է, որ «Ռուսաստանի միջուկային կոմպետենտությունն ավելի մեծ է», քան Միացյալ Նահանգներինը, իսկ ծառայությունների արժեքը ցածր է։
«Ինչ վերաբերում է ատոմային էներգիայի ոլորտում Հայաստանի և ԱՄՆ համագործակցությանը, այնտեղ կան հին խորհրդային օբյեկտներ։ Այստեղ Ռուսաստանն անկասկած ունի ավելի մեծ կոմպետենտություն և ավելի մեծ մրցունակություն։ Եվ որպես այս ոլորտում աշխարհի ամենաառաջադեմ երկիրը՝ Ռուսաստանը կարող է դիմակայել միջազգային մրցակցության ամենաբարձր մակարդակին, եթե նման մրցակցությունը պահանջված լինի գործընկերների կողմից։ Այսինքն՝ Ռուսաստանը կարող է ապահովել ավելի լավ որակ երկար տարիների համար՝ ավելի ցածր գնով»,- ասել է Դմիտրի Պեսկովը։
Թարգմանությունը՝ Էմմա Չոբանյանի