ՀՀ վարչապետ Նիկոլ Փաշինյանը հայտարարել է, որ Բիշքեկում ՌԴ նախագահ Վլադիմիր Պուտինի հետ հանդիպման ընթացքում Հայաստանում տեղակայված ռուսական ռազմաբազայի վերաբերյալ քննարկում չի եղել։ Նա այդ մասին ասել է կառավարության նիստից հետո՝ անդրադառնալով Պուտինի հետ հանդիպման արդյունքներին։
Նա նշել է, որ 102-րդ ռազմաբազայի ներկայությունը ՀՀ տարածքում կենսական անհրաժեշտություն չէ, հայտնում է Sputnik Արմենիան:
«Մենք այս ընթացքում ոչ մի անգամ Հայաստանում տեղակայված ռուսական 102–րդ ռազմաբազայի հարցը չենք բարձրացրել, սակայն այնպես էլ չէ, որ մենք համարում ենք, որ 102-րդ ռազմաբազայի ներկայությունը Հայաստանի տարածքում կենսական անհրաժեշտություն է»,– հայտարարել է Փաշինյանը։
Վարչապետի խոսքով՝ եթե Ռուսաստանը որոշի իր ռազմաբազան դուրս բերել ՀՀ-ից, ՀՀ իշխանությունները դրան չեն առարկի։
«Եթե ցանկություն արտահայտեն մնալու, մենք պատրաստ ենք նաև դա քննարկել, բայց մենք երբեք այս ընթացքում այդ հարցը չենք բարձրացել»,– վստահեցրել է վարչապետը։
ՌԴ նախագահ Վլադիմիր Պուտինը սեպտեմբերի 1-ին Բիշքեկում Նիկոլ Փաշինյանի հետ հանդիպումից հետո լրագրողների հետ զրույցում հայտարարել է, որ եթե Հայաստանը համարում է, որ ռուսական ռազմաբազայի կարիք չունի, ապա Ռուսաստանը պատրաստ է վաղն իսկ այն դուրս բերել։