Ամերիկյան Apple ընկերության գլխավոր տնօրենի պաշտոնում 15 տարվա աշխատանքն ավարտելով՝ Թիմ Քուկը հայտարարել է կազմակերպության համայնքի հանդեպ իր կապվածության մասին։ Տնօրենների խորհրդի նախագահի նոր պաշտոնում նա մտադիր է պահպանել կապը ընկերության հանրության հետ։
«Իմ սիրո ողջ ջերմությունն եմ ուղարկում Apple համայնքին՝ գլխավոր տնօրենի պաշտոնում իմ վերջին օրը։ Վաղը իմ պաշտոնը կփոխվի, սակայն Apple համայնքի հանդեպ իմ սերը կմնա անփոփոխ»:
Ընկերության ղեկավարի փոփոխության մասին պաշտոնական հայտարարությունը, որն ուժի մեջ էր մտնելու սեպտեմբերի 1-ից, հրապարակվել էր դեռևս ապրիլին։ Գլխավոր տնօրենի պաշտոնն անցել է Ջոն Տերնուսին, որը նախկինում զբաղեցնում էր Apple-ի ավագ փոխնախագահի պաշտոնը և ղեկավարում էր սարքավորումների մշակման ուղղությունը։ Տերնուսը Apple-ում աշխատում է մոտ 25 տարի՝ մասնակցելով սկզբում Mac համակարգիչների, իսկ հետագայում iPad-ի, AirPods-ի և iPhone-ի ստեղծմանը։
Քուկը շնորհակալություն է հայտնել իր հետևորդներին՝ նշելով, որ նրանք մշտական ոգեշնչման աղբյուր են եղել իր համար։
Մեկնաբանություններում միլիարդատեր Իլոն Մասկը շնորհավորել է Քուկին Apple-ում ունեցած «էպիկական կարիերայի» կապակցությամբ։
Քուկը եղել է ընկերության յոթերորդ գլխավոր տնօրենը և այդ պաշտոնը զբաղեցրել է իր բոլոր նախորդներից ավելի երկար՝ 2011-ից մինչև 2026 թվականը։ Նա Apple է տեղափոխվել 1998 թվականին՝ Compaq համակարգչային ընկերությունից։