ԱՄՆ Ներկայացուցիչների պալատի նախկին խոսնակ Նենսի Փելոսին X-ի իր միկրոբլոգում քննադատել է Հայոց ցեղասպանության վերաբերյալ ԱՄՆ փոխնախագահ Ջեյ Դի Վենսի հրապարակման հեռացումը։
Հիշեցնենք՝ Ծիծեռնակաբերդ այցելության մասին ԱՄՆ փոխնախագահի գրառումը, որում 2 անգամ հիշատակվել է Հայոց ցեղասպանությունը, ջնջվել էր՝ հրապարակումից կարճ ժամանակ անց: Ավելի ուշ հաղորդագրությունը վերահրապարակվել է Ջեյ Դի Վենսի մամուլի քարտուղար Թեյլոր Վան Քիրքի կողմից, սակայն առանց «Հայոց ցեղասպանություն» բառերի։
X-ի իր միկրոբլոգում Նենսի Փելոսին նշել է. «Երբ ես 2022 թվականին, որպես Ներկայացուցիչների պալատի խոսնակ, այցելեցի Հայաստան, մեր կոնգրեսական պատվիրակությունը կանգնեց Ծիծեռնակաբերդում և հստակ ու առանց երկմտանքի խոսեց Հայոց ցեղասպանության մասին, որովհետև ճշմարտությունը կարևոր է։
Այդ ճշմարտությունը վերահաստատվեց, երբ Ներկայացուցիչների պալատը 2019 թվականին ճնշող մեծամասնությամբ ընդունեց երկկուսակցական բանաձև՝ ճանաչելով Հայոց ցեղասպանությունը, և երբ նախագահ Բայդենը 2021 թվականին դրսևորեց բարոյական առաջնորդություն՝ պաշտոնապես ճանաչելով այն․ դիրքորոշում, որը ամոթալիորեն հետ շրջվեց Թրամփի վարչակազմի կողմից։
Խորապես հիասթափեցնող է, թեև ոչ զարմանալի, տեսնել, որ ԱՄՆ փոխնախագահը ջնջում է այդ ճշմարտությունը ճանաչող գրառումը։ Պատմությունը ջնջելը անարգում է զոհերի հիշատակը և թուլացնում մեր հանձնառությունը մարդու իրավունքների պաշտպանության հարցում ամբողջ աշխարհում»։
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: