Հայաստանի վարչապետ Նիկոլ Փաշինյանը բացառում է զիջումները երկրի ինքնիշխան տարածքից։ Իր հավաստիացումը Փաշինյանը հնչեցրել է օգոստոսի 27-ի ճեպազրույցում։
Մեկնաբանելով այս առնչությամբ մտահոգությունները՝ Փաշինյանը հայտարարել է. «Եթե նկատի ունեն Ղարաբաղը, ապա ես հպարտ եմ, որ Հայաստանը և հայ ժողովրդին դուրս եմ բերել այդ թակարդից»։
Պատասխանելով այն հարցին, թե արդյոք պատրաստվում է «անկլավները» հանձնել մինչև, թե հետո Ադրբեջանի կողմից օկուպացված Հայաստանի տարածքների ազատագրումը, Փաշինյանը ուղիղ պատասխան չի տվել։ Փոխարենը նա սկսել է խոսել այն մասին, որ անկլավների վերադարձի մասին ընդհանրապես չի խոսել, այլ միայն արտաբերել է «Քյարքի» (Տիգրանաշեն) անվանումը, արձանագրել է Հայաստանի միջազգայնորեն ճանաչված տարածքի շրջանակում 3 անկլավների բացակայությունը և Արծվաշենի առկայությունը։ Նրա խոսքով՝ դա չճանաչելը նշանակում է անուղղակիորեն պատերազմ հայտարարել Ադրբեջանին։
Փաշինյանը հավաստիացրել է, որ ամենևին մազոխիստ չէ և այդպես վարվում է բացառապես սպառնալիքը չեզոքացնելու համար, քանի որ կան արտաքին և ներքին ուժեր, որոնք ցանկանում են քանդել հաստատված խաղաղությունը։ Անկլավների թեման, շարունակել է Փաշինյանը, խաղաղության տապալման «նյարդ» պարունակող վերջին թեման էր, և ինքը հեռացրել է այդ «նյարդը»։
«Եթե չասենք Քյարքի, կստացվի, որ կհրաժարվենք Ջերմուկի տարածքներից։ Այդ դեպքում կգործի այն տրամաբանությունը, թե ով ինչ գրավել է, դա էլ իրենն է։ Անկլավների և էքսկլավների թեման վերջինն էր, որի վրա կարելի էր կառուցել խաղաղությանը խոչընդոտելու ծրագիր», – հավաստիացրել է Փաշինյանը՝ միաժամանակ հավելելով, որ Բաքվի հետ թեման չի քննարկվում, իսկ հարցերով զբաղվում է դելիմիտացիայի հանձնաժողովը, որի կանոնադրությունը երկրները վավերացրել են։ Փաշինյանը կտրականապես չի համաձայնել այն պնդման հետ, թե տարածքների փոխանցումը կխախտի երկրի մարզերի միջև հաղորդակցությունը, ինչի ապացույցը, նրա խոսքով, Կիրանցի օրինակն է։ «Քննարկումներ չկան։ Եղել է կարծիքների փոխանակում։ Դելիմիտացիայի սցենարներ։ Կլուծենք այն խնդիրը, որը շատերին անհանգստացնում է, և այն կլուծվի լավագույն ձևով։ Պետք է հանգիստ նստել և քննարկել բոլոր խնդիրները», – հայտարարել է Փաշինյանը։ Նրա խոսքով՝ փոխանցումը չպետք է ուղեկցվի մարդկանց միգրացիայով։