Հայաստանը Լեհաստանում ռազմական կցորդ կունենա
Լեհաստանի Հանրապետությունում ՀՀ դեսպանությանը կից Հայաստանի ռազմական կցորդի հաստիք կսահմանվի։ Նստավայրը կլինի Վարշավայում։
Ըստ հիմնավորման՝ Հայաստանը շահագրգիռ է ավելի ընդլայնելու և խորացնելու հարաբերությունները Լեհաստանի հետ ինչպես երկկողմ, այնպես էլ բազմակողմ ձևաչափերով, և Լեհաստանում ՀՀ ռազմական կցորդի առկայությունը ևս մեկ խթան կհանդիսանա երկկողմ համագործակցության խորացման համատեքստում:
Ռազմական կցորդի առկայությունը կապահովի պաշտպանության ոլորտում հարաբերությունների բարձրացմանը գործընկերության ավելի բարձր մակարդակի:
Իսկ Լեհաստանում հավատարմագրված ռազմական կցորդը պետք է իրականացնի ներկայացուցչական աշխատանք, որը ներառում է երկու երկրների ռազմական գերատեսչությունների հետ պաշտոնական կապերի հաստատում և խորացում, ռազմական ոլորտում հարաբերությունների զարգացում, համագործակցության ծրագրերի իրականացման մշտադիտարկում, օժանդակության ցուցաբերում նախարարության և զինված ուժերի պատվիրակությունների այցերի կազմակերպման ժամանակ:
Նախատեսվում է, որ իր պարտականությունների կատարմանը կանցնի 2027 թվականի հունվարի 1-ից՝ Լեհաստանի Հանրապետության արտաքին գործերի նախարարությանը ՀՀ ռազմական կցորդի նշանակման մասին ծանուցման, ընդունված կարգի համաձայն հավատարմագրման ընթացակարգի անցկացման և համապատասխան մարմնի՝ այդ պաշտոնում ռազմական կցորդի նշանակվելու մասին համաձայնության տրամադրման դեպքում:
Նախագիծը կառավարության անդամներին ներկայացնելու է Պաշտպանության նախարար Սուրեն Պապիկյանը։