Պուտինը Կիևի առաջարկներն անվանել է էկզոտիկ և անընդունելի
ՌԴ նախագահ Վլադիմիր Պուտինը լրագրող Պավել Զարուբինին տված հարցազրույցում անդրադարձել է Ուկրաինայի դեմ պատերազմի ընթացքին, ռուսական հարվածներին և Կիևի իշխանությունների գործողություններին։
Պուտինի խոսքով՝ ռուսական զինված ուժերի հարվածներն Ուկրաինայի ենթակառուցվածքներին արդյունավետ են և ժամանակին, ինչպես նաև օգնում են ռուս զինծառայողներին կատարել իրենց առջև դրված մարտական խնդիրները։ Նա նշել է, որ Ուկրաինայի ուղղությամբ ռուսական զինված ուժերի հարվածներն «ամենաուղղակի և դրական» ազդեցությունն են ունենում ռազմական գործողությունների ընթացքի վրա։
ՌԴ նախագահը հայտարարել է, որ Ռուսաստանին փորձել են հասցնել փլուզման, իսկ «նեոնացիստներն» առանձնահատուկ հաճույք են ստանում խաղաղ բնակիչներին հարվածելուց։
Պուտինի խոսքով՝ Ուկրաինայի զինված ուժերի հարվածները Ռուսաստանի ուղղությամբ չեն հանգեցրել Ռուսաստանի հետ դիմակայության ընթացքի որևէ շրջադարձի։ Միաժամանակ նա նշել է, որ Ռուսաստանը մեծացրել է Ուկրաինայի ձեռնարկություններին հասցվող հարվածների ինտենսիվությունը՝ ի պատասխան Ռուսաստանի քաղաքացիական օբյեկտների ուղղությամբ իրականացված հարվածների։
Պուտինը հայտարարել է, որ Կիևի իշխանություններն իրենք են «ջինին շշից հանել»՝ սկսելով հարվածներ հասցնել տնտեսական օբյեկտներին։ Նրա խոսքով՝ Ռուսաստանի պատասխան հարվածներն ավելի ավերիչ են, քան Ուկրաինայի հարվածները Ռուսաստանի ուղղությամբ։
ՌԴ նախագահի պնդմամբ՝ ռուսական զորքերը մեծացրել են հարձակման տեմպերը և վստահորեն կատարում են իրենց առջև դրված խնդիրները։ Նա նաև նշել է, որ Ուկրաինայի զինված ուժերի գործողություններին Ռուսաստանի պատասխան քայլերը զգալի ազդեցություն են ունենում Կիևի վրա, և «աղետալի միտումներ» են նկատվում Ուկրաինայի իշխանությունների համար։
Անդրադառնալով Ուկրաինայի կողմից ներկայացված առաջարկներին՝ Պուտինը նշել է, որ դրանք երբեմն «էկզոտիկ» են և Ռուսաստանի համար անընդունելի։
«Կիևի իշխանություններն իրենք են ջինը շշից բաց թողել՝ սկսելով հարվածներ հասցնել քաղաքացիական օբյեկտներին»,– ասել է Պուտինը։
Նա նաև հայտարարել է, որ հակառակորդը փորձում է վախեցնել Ռուսաստանի քաղաքացիներին և խափանել ընտրությունները, սակայն այդ փորձը, իր համոզմամբ, դատապարտված է ձախողման։
Պուտինը, անդրադառնալով «Եդինայա Ռոսիա» կուսակցությանը իր աջակցությանը, այն բնական է անվանել՝ նշելով, որ ժամանակին ինքն է մասնակցել կուսակցության ստեղծմանը։