ԱԺ եվրոպական ինտեգրման հարցերի մշտական հանձնաժողովի նախկին նախագահ Արման Եղոյանը լրագրողների հետ զրույցում անդրադարձավ Հայաստանի արտաքին քաղաքական կողմնորոշմանը, ԵՏՄ-ում մնալու նպատակահարմարությանը և ընդդիմության կողմից առաջադրված հանձնաժողովի նախագահի թեկնածուի պատրաստվածությանը։
Եղոյանը շեշտեց, որ Հայաստանի դիրքորոշումը Եվրամիությանն անդամակցելու հարցում հստակ է և ամրագրված է օրենսդրորեն։
«Իհարկե, կքվեարկեինք Եվրամիության անդամ դառնալուն կողմ»,- սակայն հավելեց, որ հանրաքվեի անցկացման ժամկետները Հայաստանի և ԵՄ-ի ներքին հարաբերությունների տիրույթում են և չեն կարող որոշվել երրորդ պետության կողմից։
Խոսելով ԵՏՄ-ից դուրս չգալու պատճառների մասին՝ Եղոյանը նշեց, որ այս պահին կառույցում մնալը Հայաստանի համար տնտեսապես «փոխշահավետ է»․ «Մեր վճարած մաքսերի ծավալը և հետ ստացած ծավալը մոտ… երկու անգամ գերազանցում է մեր վճարածը»։
Եվրոպական ինտեգրման հարցերի հանձնաժողովի նախագահի պաշտոնում ընդդիմության առաջադրած թեկնածուի՝ Արեգա Հովսեփյանի վերաբերյալ Եղոյանը նկատեց, որ թեկնածուն դեռ պետք է ադապտացվի խորհրդարանական միջավայրին։ Նրա գնահատմամբ՝ Հովսեփյանը «այդքան էլ լավ չի պատկերացնում, թե ինչ է իրենից ներկայացնում եվրաինտեգրման պրոցեսը» և չի տիրապետում գործընթացի բոլոր դետալներին։
Անդրադառնալով վարչապետ Նիկոլ Փաշինյանի՝ ընդդիմության քվեների վերաբերյալ «100% կեղծ» լինելու հայտարարությանը՝ Եղոյանը պարզաբանեց, որ դա քաղաքական գնահատական է, այլ ոչ թե մաթեմատիկական կամ ֆիզիկական փաստ։
«Դուք հասկացեք վարչապետի ասածը այնպես, որ մեծապես ընտրակաշառք գործեց»,- նշեց նա՝ հավելելով, որ քաղաքականության մեջ բառերը կարող են ունենալ «տարածական մեկնաբանություն»։
Մանրամասները՝ տեսանյութում։
Եվգենյա Համբարձումյան