Յուրիկ Մխիթարյանը ադրբեջանցու նկատմամբ տպավորիչ հաղթանակով դուրս եկավ Սլովակիայի մայրաքաղաք Բրատիսլավայում ընթացող հունահռոմեական ըմբշամարտի մինչեւ 20 տարեկանների աշխարհի առաջնության քառորդ եզրափակիչ:
67 կգ քաշայինների 1/8 եզրափակիչում Յուրիկ Մխիթարյանը ադրբեջանցի Մուրադ Ռովսան Ալիեւին հաղթել է 13:6 հաշվով: Որակավորման փուլում հայ ըմբիշը 3:1 հաշվով պարտության է մատնել մոլդովացի Մաքսիմ Դամասչինին:
Քառորդ եզրափակիչում Յուրիկ Մխիթարյանը կգոտեմարտի լեհ Իոսիֆ Զլոտարի հետ:
Հայաստանի մյուս ներկայացուցիչ 97 կգ քաշային Էրիկ Տեր-Մաթեւոսյանը որակավորման փուլում տեխնիկական հաղթանակ է տարել մրցակցի չներկայանալու պատճառով: 1/8 եզրափակիչում Տեր-Մաթեւոսյանը կմրցի բուլղարացի Ռադոստին Վասիլեւի հետ:
Երկրորդ մրցումային օրը պայքարի մեջ մտած Էդգար Պետրոսյանը (55 կգ) եւ Գոռ Խաչատրյանը (72 կգ) պարտվել են մեկնարկային գոտեմարտերում:
55 կգ քաշային Էդգար Պետրոսյանը 1/8 եզրափակիչում 1:10 հաշվով պարտվել է ադրբեջանցի Էմին Ջավալդիին:
72 կգ քաշային Գոռ Խաչատրյանը 1:10 հաշվով պարտություն է կրել Ռուսաստանը ներկայացնող Մինգիան Գորիաեւից:
Երեկոյան մրցահերթում ոսկե մեդալի համար կգոտեմարտեն 77 կգ քաշային Սամվել Տերտերյանն ու 87 կգ քաշային Յուրիկ Պետրոսյանը։