Վերջին 24 ժամվա ընթացքում Եմենի զինված ուժերը 181 ռազմական գործողություն են իրականացրել «Անսար Ալլահ» շարժման հուսիթ ապստամբների թիրախների դեմ, հայտնել է Եմենի բանակի խոսնակ գնդապետ Մաջիդ ալ-Նուզայլին։
«Վերջին 24 ժամվա ընթացքում զինված ուժերը 181 ռազմական գործողություն են իրականացրել՝ օգտագործելով անօդաչու թռչող սարքեր, հրետանի և բազմակի հրթիռային համակարգեր, հարվածելով ռազմական թիրախներին և սպառնալիքի աղբյուրներին <...> տարբեր մարտական գոտիներում», – ասել է ալ-Նուզայլին Եմենի պաշտպանության նախարարության կողմից տարածված հայտարարության մեջ։ Ըստ խոսնակի՝ հարվածների հետևանքով զոհվել և վիրավորվել են «Անսար Ալլահ»-ի տասնյակ մարտիկներ, ոչնչացվել են տասնյակ մեքենաներ և զենքի պահեստներ։
Գործողությունները իրականացվել են շփման գծի երկայնքով գտնվող լայն տարածքում, այդ թվում՝ Թաիզ, Հոդեյդա, Աբյան, Մարիբ և Ադ-Դալի նահանգների ծայրամասերում։
Եմենում կառավարական ուժերի և հուսիթ ապստամբների միջև հակամարտությունը շարունակվում է 2014 թվականի օգոստոսից։ 2026 թվականի ամռանը երկրում իրավիճակը կրկին կտրուկ սրվեց։ Օգոստոսի 14-ին ապստամբները զանգվածային հրթիռային հարձակում էին ձեռնարկել Կարմիր ծովի ափին տեղակայված Մոխա նավահանգստի վրա՝ ամբողջությամբ դադարեցնելով դրա գործունեությունը։