«Սահմանը փակ է, քանի՞ ծիրան է վաճառվել Թուրքիայում, քանի՞ քար է դրվել Անիի կամրջի վրա»․ Արթուր Խաչատրյանը՝ Ռուբեն Ռուբինյանին

«Մինչև ՀՀ-Թուրքիա հարաբերությունների կարգավորման գործընթացը սահմանը փակ էր, առևտուր չկար, հիմա սահմանը դարձյալ փակ է։ Քանի՞ ծիրան է վաճառվել Թուրքիայում կամ Թուրքիայի միջոցով անցել մի տեղ։ Քանի՞ քար է դրվել Անիի կամրջի վրա, որ կամուրջը վերակառուցվի։ Խնդրեմ՝ հնարավորինս կոնկրետ ասեք՝ էական փոփոխություն ի՞նչ կլիներ, եթե ՀՀ-Թուրքիա հարաբերություններում չլինեին բանակցությունները երկու հատուկ բանագնացների միջև»,- 9-րդ գումարման ԱԺ անդրանիկ նիստի ժամանակ Ռուբեն Ռուբինյանին հարցրեց «Հայաստան» խմբակցության պատգամավոր Արթուր Խաչատրյանը։

Ռուբեն Ռուբինյանն արձագանքեց․ «Ձեր խմբակցության հարցերի տողատակը հետևյալն է՝ ինչո՞ւ բավարար արագ չի շարժվում ՀՀ-Թուրքիա կարգավորումը։ Տարօրինակ է՝ դուք պետք է դրանով ուրախ լինեիք, դուք դեմ չէի՞ք այդ կարգավորմանը։ Ֆիքսենք, որ Դաշնակցությունը դեմ չէ ՀՀ-Թուրքիա կարգավորման գործընթացին։ Հուսով եմ, որ գործընթացի շարունակման ընթացքում ով էլ զբաղվի այդ գործով, կունենա ձեր աջակցությունը, որը հինգ տարի ի տարբերություն ինձ ընդդիմադիրներից ոչ թե աջակցություն է ստացել, այլ ահռելի ճնշում»։

ԱԺ նիստն ամբողջությամբ՝ տեսանյութում

Տաթև ՀԱՐՈՒԹՅՈՒՆՅԱՆ