Բելառուսի ՊԱԿ-ի աշխատակիցները հարցաքննության են կանչում Լեհաստանում արդեն սովորող կամ ուսման մեկնելու նպատակով փաստաթղթեր ձևակերպող բելառուս ուսանողներին։
Այս մասին հայտնել է «Վյասնա» մարդու իրավունքների կենտրոնը՝ հավելելով, որ հարցազրույցներ են անցկացվում նաև անչափահասների հետ՝ նրանց ծնողների ներկայությամբ։
ՊԱԿ-ի աշխատակիցներին հետաքրքրում է ուսումնական հաստատության մասին տեղեկատվությունը՝ ովքեր են սովորում այնտեղ, որքան է ուսման վարձը, ինչու այն կարող է անվճար լինել օտարերկրացիների համար, ինչպես նաև ծրագրերի, մասնագիտության ընտրության և Լեհաստանում ծանոթների շրջանակի մասին:
Ավելին, ըստ մարդու իրավունքների պաշտպանների՝ անվտանգության աշխատակիցները հետաքրքրվում են ուսանողների համակուրսեցիներով, ինչպես նաև Telegram-ի հաղորդագրություններով, անուններով, հեռախոսահամարներով և արտասահմանում գտնվող մարդկանցով։
Հիշեցնենք, որ հունիսին Բելառուսում սկսվել էին այն անձանց խուզարկություններն ու հարցաքննությունները, որոնք, ըստ իշխանությունների, կապված են Լիտվայում գործող Եվրոպական հումանիտար համալսարանի հետ կապված, հայտնում է «Վյասնա» մարդու իրավունքների կենտրոնը։
Անվտանգության աշխատակիցներն այցելել են ուսանողներին և նրանց ընտանիքներին ու սպառնացել քրեական հետապնդմամբ, եթե նրանք չհեռանան ուսումնական հաստատությունից։