ԱՄՆ-ի և Իսրայելի հետախուզական գործակալությունները՝ Կենտրոնական հետախուզական վարչությունն ու «Մոսսադը», գաղտնի գործողություն են իրականացնում Իրանի նոր գերագույն առաջնորդ այաթոլլա Մոջթաբա Խամենեիին գտնելու համար, հաղորդել է բրիտանական «The Times» թերթը։
Ըստ թերթի՝ գործողությունը շարունակվում է արդեն որոշ ժամանակ: Հետախուզական գործակալությունների նպատակը Խամենեիին վերացնելը չէ: Հիմնական նպատակն է պարզել, թե արդյոք նա ողջ է, նրա վիճակը և բնակության վայրը։
Թերթը նշել է, որ հոր կորստից և Մոջթաբա Խամենեիի լուրջ վնասվածքի մասին լուրից հետո նա ոչ մի հեռախոսազանգ չի կատարել կամ համակարգիչ չի օգտագործել, ինչն էլեկտրոնային հետախուզությունը դարձնում է անօգուտ։
ԿՀՎ-ն և Իսրայելի «Մոսսադը» հույսը դնում են Իրանի ներսում գործող հետախուզական ցանցի վրա: Կարծիք կա, որ այաթոլլայի վայրը կարելի է որոշել նրան գրավոր հաղորդագրություններ հասցնող սուրհանդակների միջոցով։
Հրապարակումը զուգահեռ է անցկացնում «Ալ-Քաիդայի» առաջնորդ Ուսամա բեն Լադենին գտնելու գործողության հետ: Այն ժամանակ ամերիկյան հետախուզությունը կարողացել էր ճշգրիտ որոշել նրա վայրը՝ հետևելով նրա սուրհանդակներին։ «Մոջթաբային գտնելու միակ իրական ճանապարհը նրա հետ կապի մեջ լինող մեկին հավաքագրելն է։ Բայց դա աներևակայելի դժվար է», – ասել է «Մոսսադի» ստորաբաժանման նախկին ղեկավար Ռամի Իգրան։
Նա ասել է, որ Իսլամական հեղափոխության պահապանների կորպուսի միայն երկու կամ երեք անդամ կարող էր իմանալ Խամենեիի բնակության վայրը։