ԱՄՆ նախագահ Դոնալդ Թրամփն ավելի քան մեկ տարի իր խորհրդականների հետ մասնավոր զրույցներում պնդում էր, որ Ուկրաինան պարտվում է պատերազմում, սակայն վերջին շաբաթներին նա լավատեսություն է հայտնել Կիևի և Ուկրաինայի առաջնորդ Վլադիմիր Զելենսկիի հետ կապված։ Այս մասին հաղորդում է The Wall Street Journal-ը՝ Վաշինգտոնում կայանալիք Թրամփ-Զելենսկի հանդիպումից առաջ, գրում է BBC-ի ռուսական ծառայությունը։
Աղբյուրների համաձայն՝ Թրամփը տպավորված է Զելենսկիի դիմադրողականությամբ, որը պատերազմը տեղափոխել է Ռուսաստանի ավելի խորը տարածք։
«Այս տեղաշարժը տեղի է ունեցել համաշխարհային գագաթնաժողովների շրջանակում մի քանի հանդիպումներից հետո, որտեղ Ուկրաինայի նախագահը փորձել է հմայել Թրամփին, ըստ աղբյուրների՝ որպես եվրոպացի առաջնորդների կողմից հարաբերությունները բարելավելու նպատակային արշավի մաս: Թրամփը հիացած է Ուկրաինայի անօդաչու թռչող սարքերի արդյունաբերությամբ, հատկապես դրա՝ նոր ԱԹՍ-ներից իրեն պաշտպանելու կարողությամբ, որոնց ԱՄՆ-ը բախվում է Իրանի հետ պատերազմում»,- նշվում է հոդվածում։
Թրամփը սիրում է հաղթողներին, և Զելենսկին, ըստ ԱՄՆ նախագահի, «ավելի ու ավելի է նմանվում դրանցից մեկին», ասել է WSJ-ի Սպիտակ տան աղբյուրներից մեկը։
«Մեզ մոտ իսկապես լավ հարաբերություններ են ձևավորվել։ Դժվար է հավատալ, այնպես չէ՞»,- ասել էր Թրամփը Զելենսկիի հետ հուլիսի 8-ին՝ Թուրքիայում ՆԱՏՕ-ի գագաթնաժողովի շրջանակում հանդիպման ժամանակ։
«Սա ուշագրավ շրջադարձ է Զելենսկիի համար, որի հարաբերությունները Թրամփի հետ մի ժամանակ, թվում էր, անհույս կերպով փչացել են։ Թրամփի նորահայտ հարգանքը Զելենսկիի նկատմամբ կշարունակվի՞․ հարց է։ Թրամփին մոտ կանգնած մարդիկ նշում են, որ նրա տեսակետները երբեմն արագ փոխվում են՝ հավելելով, որ Ռուսաստանի նախագահ Վլադիմիր Պուտինն անցյալում ապացուցել է իր դիրքորոշումը Թրամփի և նրա որոշ օգնականների առաջ պաշտպանելու արդյունավետությունը»,- գրում է լրատվամիջոցը։