Երևան-Սևան մայրուղում գործող վառելիքի մանրածախ առևտրով զբաղվող ընկերությունը պետական բյուջե չի վճարել 210 մլն դրամ հարկ. ՎԻԴԵՈ
ԵՐԵՎԱՆ, 28 հուլիսի․/ԱՌԿԱ/․ Երևան-Սևան մայրուղում գործող վառելիքի մանրածախ առևտրով զբաղվող ընկերությունը թաքցրել է շուրջ 600 մլն դրամի իրացման շրջանառություն, ինչի հետևանքով պետական բյուջե չի վճարվել 210 մլն դրամ հարկ, հայտնում է ՀՀ պետական եկամուտների կոմիտեի մամուլի ծառայությունը։
ՊԵԿ հետաքննության և օպերատիվ հետախուզության վարչությունում ստացված տվյալների հիման վրա իրականացվել են ծավալուն օպերատիվ-հետախուզական միջոցառումներ։ Ընկերության գազալցակայանների լիցքավորման աշտարակներից դուրս են բերվել իրացման տվյալները, ուսումնասիրվել են վաճառքի մատյաններն ու սևագիր գրառումները, որոնք համադրվել են ՊԵԿ տեղեկատվական բազայի հետ։
Պարզվել է, որ 2022-2026 թվականներին ընկերությունը սեղմված բնական գազի, հեղուկ գազի, բենզինի և դիզելային վառելիքի վաճառքի մասով թերհայտարարագրել է շուրջ 600 մլն դրամի շրջանառություն։
Առերևույթ հանցանքի մասին հաղորդում է ներկայացվել ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն, որտեղ նախաձեռնվել է քրեական վարույթ։
Ծանուցում. Ենթադրյալ հանցանքի մեջ մեղադրվողը համարվում է անմեղ, քանի դեռ նրա մեղավորությունն ապացուցված չէ օրենքով սահմանված կարգով՝ դատարանի՝ օրինական ուժի մեջ մտած դատավճռով: