Apple-ը և Micron Technology-ն ճնշում են գործադրում Թրամփի վարչակազմի վրա՝ չինական հիշողության չիպերի օգտագործման հարցում հակադիր որոշումներ ընդունելու նպատակով։ Նախագահը պետք է ընտրություն կատարի սպառողական գների նվազեցման և կիսահաղորդիչների ներքին արտադրությունն ընդլայնելու նպատակի միջև, հայտնում է The Wall Street Journal-ը։
Apple-ի գլխավոր գործադիր տնօրեն Թիմ Կուկը և ընկերության այլ բարձրաստիճան ղեկավարներ վարչակազմի ներկայացուցիչներին դիմել են՝ չինական ChangXin Memory Technologies և Yangtze Memory Technologies ընկերությունների արտադրած հիշողության չիպերն ԱՄՆ-ից դուրս վաճառվող սարքերում օգտագործումը թույլատրելու համար։
iPhone արտադրող ընկերությունը պնդում է, որ չինացի մատակարարների ներգրավումը կօգնի մեղմել հիշողության համաշխարհային դեֆիցիտը և զսպել ամերիկացի սպառողների համար գների աճը։ Ըստ առկա տվյալների՝ Կուկն այս առաջարկը քննարկել է Թրամփի, առևտրի նախարար Հովարդ Լուտնիկի և ֆինանսների նախարար Սքոթ Բեսենթի հետ։
Micron-ը՝ հիշողության չիպերի միակ խոշոր ամերիկյան արտադրողը, դեմ է այս նախաձեռնությանը։ Ընկերության ղեկավարները նախազգուշացրել են, որ ամերիկյան տեխնոլոգիական ընկերություններին չինական արտադրողներից արտադրանք գնելու թույլտվությունը կարող է թուլացնել ներքին արտադրությունը՝ անկախ նրանից, թե որտեղ է վաճառվում պատրաստի արտադրանքը։
Երկու ընկերությունները՝ CXMT-ն և YMTC-ն, Պենտագոնի կողմից ճանաչվել են չինական ռազմական ձեռնարկություններ, իսկ YMTC-ն ներառված է նաև ԱՄՆ-ի վերահսկվող կազմակերպությունների ցանկում (Entity List)։ Սպիտակ տան տեխնոլոգիական հարցերով խորհրդական Մայքլ Կրացիոսը օրենսդիրներին հայտնել է, որ ամերիկյան ընկերությունները չպետք է գործարար հարաբերություններ ունենան առևտրային սև ցուցակում ընդգրկված կազմակերպությունների հետ։
Հակամարտությունը սրվել է այն ֆոնին, որ վերջին մեկ տարվա ընթացքում հիշողության չիպերի գները քառապատկվել են, ըստ TechInsights-ի տվյալների։ Արհեստական բանականության տվյալների կենտրոնները ավելի ու ավելի մեծ քանակությամբ առաջադեմ հիշողություն են սպառում բարձր գներով, ինչը սահմանափակում է Apple-ի բանակցային հնարավորությունները և սրում մատակարարումների համար մրցակցությունը սմարթֆոնների, ավտոմեքենաների և բժշկական սարքավորումների ոլորտներում։
Apple-ը Micron-ին մեղադրել է դեֆիցիտից շահույթ ստանալու մեջ՝ մատնանշելով 80%-ը գերազանցող համախառն շահութաբերությունը և հայտարարելով, որ արտադրական նոր հզորությունները անհամաչափորեն ուղղվում են արհեստական բանականության ոլորտի հաճախորդների սպասարկմանը։
Micron-ը պնդում է, որ սպառողական էլեկտրոնիկայի գների աճը պայմանավորված է ոչ միայն հիշողության չիպերի արժեքով։ Ընկերությունը խոստացել է 250 մլրդ դոլար ներդնել ԱՄՆ-ում արտադրության զարգացման համար և հայտարարել է, որ ներքին գործարանների շինարարության արագացումը թույլ կտա վերացնել մատակարարումների դեֆիցիտը՝ առանց չինական արտադրողների ներգրավման։
Թրամփը բարձր է գնահատել երկու ընկերությունների ներդրումներն ԱՄՆ տնտեսության մեջ։ Նրա վարչակազմը նաև առևտրային բանակցություններ է վարում Պեկինի հետ, ինչը լրացուցիչ բարդացնում է ցանկացած որոշման ընդունումը, որը կարող է նոր սահմանափակումներ մտցնել չինական տեխնոլոգիական մատակարարների նկատմամբ։
Տեխնոլոգիական հրապարակումներն իրականացվում են Իդրամի աջակցությամբ։