Հայաստանի առաջատար թենիսիստուհիները Համբուրգի մրցաշարի քառորդ եզրափակչում են

Համբուրգում ընթացող MSC Hamburg Ladies Open մրցաշարում Հայաստանի թենիսիստուհիներ Էլինա Ավանեսյանը եւ Ալինա Չարաեւան շարունակում են հաղթանակ տանել։

Էլինան, որը ներկայումս WTA դասակարգմամբ 208-րդն է, երկրորդ շրջանում 6։3, 2։6, 6։2 հաշվով առավելության հասավ Ղազախստանի ներկայացուցիչ, աշխարհի 79-րդ ռակետ Յուլիա Պուտինցեւայի նկատմամբ։ Նրանց դիմակայությունը տեւեց 2 ժամ 10 րոպե։

Քառորդ եզրափակչում մեր թենիսիստուհու մրցակիցը լինելու է ուկրաինուհի Ալեքսանդրա Օլեյնիկովան։

Երկրորդ շրջանում Ավստրիան ներկայացնող Սինյա Կրաուսի նկատմամբ հաղթանակը այլեւս Հայաստանի դրոշի ներքո հանդես եկող Ալինա Չարաեւային տրվեց քիչ ավելի դժվար։ 3 ժամ 3 րոպե պահանջվեց, որպեսզի Ալինան 5։7, 7։5, 7։5 հաշվով նրան պարտության մատներ։ ¼ եզրափակչում Ալինա Չարաեւան ուժերը չափելու է հունգարացի Աննա Բոնդարի հետ։

Աշոտ ՀԱԿՈԲՅԱՆ