Իրանի իսլամական հեղափոխության 47-րդ տարեդարձի առթիվ փետրվարի 7-ին և 8-ին Կապանում գտնվող ԻԻՀ գլխավոր հյուպատոսարանում կազմակերպվել էր իրանական ապրանքների ցուցահանդես-վաճառք:
1979-ի փետրվարի 11-ին հասարակական տարբեր խավերի մասնակցությամբ Իրանի ժողովրդական հեղափոխությունը հաղթեց, որն էլ սկսվեց տոնվել որպես «Իրանի իսլամական հեղափոխության» հաղթանակի օր:
Անցած 47 տարում, չնայած խիստ պատժամիջոցներին, բոլոր ոլորտներում երկիրը համաշխարհային մակարդակով մեծ առաջընթաց է գրանցել: Հատկապես տնտեսության, գիտության, բժշկության, մշակույթի, օդատիեզերական և ռազմական ոլորտներում:
Այդ ամենի մասին հյուպատոսարանի առաջին հարկում բացված ցուցահանդեսի վահանակներն էին պատմում՝ ներկայացնելով երկրի տարբեր բնագավառներում իրավիճակն իրանական հեղափոխությունից առաջ և հետո:
Այդ մասին ցուցահանդես-վաճառք այցելած մարդկանց համար ցուցադրվեց տեսաֆիլմ:
Իսկ դրսում կազմակերպվել էր ցուցահանդես-վաճառք, տաղավարներում ներկայացված էին պարենային ապրանքներ, լվացող պարագաներ, տարբեր տեսակի պահածոներ, միրգ ու քաղցրավենիք, զանազան գորգեր, հուշանվերներ: Մատուցվում էր բուրավետ թեյ:
Սա արդեն երրորդ ցուցահանդես-վաճառքն է, որ կազմակերպվում է Կապանում: Այստեղ հանդիպեցինք Հաբիբ Դիդարին՝ Թավրիզի Իսլամական արվեստի պետական համալսարանի ցուցահանդեսների բաժնի կազմակերպչին: Նա ցուցահանդեսին էր ներկայացրել համալսարանի ուսանողների և Թավրիզի արվեստագետների աշխատանքները՝ կերամիկական իրերի նմուշներ, տարբեր զարդեր, ձեռքի աշխատանքներ: Հաբիբ Դիդարը հայտնեց, որ նպատակ ունեն Կապանի արվեստի քոլեջի հետ կազմակերպել համատեղ ցուցահանդես:
Ցուցահանես-վաճառքը շարունակվեց փետրվարի 8-ին՝ աշխույժ առևտրով, միջոցառմանը տոնական երանգներ հաղորդեցին Իրանի Գիլան նահանգի «Գիլախան» երաժշտախմբի կատարումները:
Տոնական այդ օրերին մենք հանդիպեցինք նաև Կապանում ԻԻՀ գլխավոր հյուպատոս Մորթեզա Աբեդին Վարամինին, ով չափազանց կարևորում է հայ-իրանական մշակութային կապերը, Իրանի գիտատեխնիկական նվաճումները Սյունիքի հանրությանը ներկայացնելը:
Ամեն ինչից բացի Իսլամական հեղափոխության 47-րդ տարեդարձն այդկերպ՝ տոնականորեն նշանավորելը ևս մեկ օրինակ է այն իրողության, որ չնայած ԱՄՆ-ն շարունակում է սպառնալիքներ ուղղել մեր բարեկամ այդ երկրին, բայց Իրանի ժողովուրդը չի դադարեցնում իր արժանապատիվ ու հպարտ երթը դժվարությունների և փորձությունների միջով:
Վահրամ Օրբելյան