Բելգիայի վարչապետը փոքր-ինչ զարմացել է, երբ Թուրքիայում կայացած ՆԱՏՕ-ի գագաթնաժողովից տուն վերադառնալիս պարզել է, որ իր ուղեբեռում ատրճանակ և փամփուշտներ կան, գրում է Reuters-ը։ Գագաթնաժողովի համար Անկարայում հավաքվելուց հետո ՆԱՏՕ-ի առաջնորդներին հյուրընկալած Թուրքիայի նախագահ Ռեջեփ Թայիփ Էրդողանը նրանց արտասովոր հրաժեշտի նվեր է մատուցել՝ մարտական փամփուշտներով վինտաժային ատրճանակ։
Ըստ հրապարակման՝ Էրդողանն այդպիսով ցանկանում էր ցուցադրել Թուրքիայի պաշտպանական արդյունաբերության կարողությունները, որը դարձել է արտահանման և արտաքին քաղաքականության հիմնական գործիք։ Լիտվայի նախագահ Գիտանաս Նաուսեդայի գրասենյակի կողմից տարածված լուսանկարներում երևում է Gumusay.357 Magnum-ը՝ հազվագյուտ վեց փամփուշտանոց հրացան, որն արտադրվել է թուրքական MKE ընկերության կողմից 1990-ականներին։ Այն դրված է եղել փայտե տուփի մեջ, որի վրա պատկերված են Թուրքիայի դրոշը և ՆԱՏՕ-ի լոգոն, ինչպես նաև պաստառ՝ «Gumusay, մեր երկրում արտադրված առաջին ռևոլվերային տիպի ատրճանակը» գրությամբ՝ թուրքերեն և անգլերեն լեզուներով։
Իսպանիայի վարչապետ Պեդրո Սանչեսի խոսնակը հայտնել է, որ բոլոր առաջնորդներին տրվել է ատրճանակի նույն մոդելը։
Բելգիայի վարչապետ Բարտ դե Վևերն իր ատրճանակը հանձնել է Բրյուսելի օդանավակայանի ոստիկանությանը։
Լեհաստանի նախագահ Կարոլ Նավրոկիի օգնականը Radio RMF FM-ին ասել է, որ ատրճանակը սպասում է մաքսային ձևակերպման Վարշավայի օդանավակայանում և կպահվի համապատասխան տեղում, «որպեսզի նախ՝ անվտանգ լինի, և երկրորդ՝ պահվի որպես նվեր»։
«Իհարկե, ոչ ոք չի կրակի դրանից»,- հավելել է նա։
Հոլանդիայի և Շվեդիայի վարչապետների գրասենյակները հայտնել են, որ նրանց ատրճանակները տարվել են Անկարայում իրենց դեսպանատներ։
Դաունինգ սթրիթի աղբյուրի համաձայն՝ Մեծ Բրիտանիայի վարչապետ Քիր Սթարմերի ատրճանակը ներառել է մաքրելու համար նախատեսված հավաքածու և 500 փամփուշտ։ Իտալիայի վարչապետ Ջորջիա Մելոնիի ատրճանակն արդեն պահվում է կառավարական նստավայրում՝ Պալացո Չիջիում, այլ պետական նվերների հետ միասին։
ԵՄ հանձնաժողովի նախագահ Ուրսուլա ֆոն դեր Լայենը մտադիր է իր զենքը նվիրաբերել ռազմական թանգարանին, մինչդեռ Հունաստանի առաջնորդը ծրագրում է իր զենքը նվիրաբերել Աթենքի Պատերազմի թանգարանին։
Ժամանակակից թուրքական ատրճանակների արդյունաբերությունը հիմնականում կենտրոնացած է կիսաավտոմատ զենքերի վրա, ինչը Gumusay-ը դարձնում է հավաքածուի համար նախատեսված իր։ Թուրք զինագործները ներթափանցել են եվրոպական քաղաքացիական հրազենի շուկա՝ առաջարկելով մատչելի ատրճանակներ և որսորդական հրացաններ, մարտահրավեր նետելով իտալական և բելգիական արդեն իսկ հաստատված ապրանքանիշերին:
Ժնևում գործող Small Arms Survey-ի համաձայն՝ Թուրքիան 2019-2024 թվականներին աշխարհում փոքր զենքի երրորդ խոշորագույն արտահանողն էր․ այդ ժամանակահատվածում արտահանման ընդհանուր ծավալը կազմել է շուրջ 3 միլիարդ դոլար՝ զիջելով միայն Միացյալ Նահանգներին և Իտալիային։
Թարգմանությունը՝ Էմմա Չոբանյանի