Վաղ առավոտից տարբեր կուսակցությունների ներկայացուցիչների կողմից զանգեր, սատարման, աջակցման խոսքեր, պատրաստակամություն լսել եմ, անձամբ ես բազմաթիվ ուժերի ներկայացուցիչների հետ խոսել եմ և որքանով տեղյակ եմ՝ նրանք պատրաստվում են հայտարարությամբ հանդես գալ։ Այս մասին, այսօր՝ հուլիսի 6–ին, ԲՀԿ առաջնորդ Գագիկ Ծառուկյանի տան դիմաց լրագրողների հետ զրույցում նշեց նրա խոսնակ Իվետա Տոնոյանը՝ անդրադառնալով նրան, որ վաղ առավոտից ԲՀԿ առաջնորդ Գագիկ Ծառուկյանի տանը և նրան պատկանող բազմաթիվ ընկերություններում խուզարկություններ են ընթանում։
Հարցին՝ եթե Գագիկ Ծառուկյանը չմասնակցեր ընտրական գործընթացիենրին, այս ամենը իր նկատմամբ տեղի կունենա՞ր, նա պատասխանեց. «Գագիկ Ծառուկյանը ինքն է որոշում իր գործունեության, «Բարգավաճ Հայաստանի» մասնակցության և մնացած բոլոր հարցերի հետ կապված որոշումները կայացնում է անձամբ։ Այս դեպքում ևս Գագիկ Ծառուկյանը կայացրել է ընտրություններին մասնակցելու որոշում, որովհետև որպես հայ մարդ, սրտացավ մարդ պարզապես ձեռքերը ծալած և անտարբեր նստել չէր կարող՝ տեսնելով այն ամբողջ գործընթացները, որոնք ցավոք հետպատերազմյան, Հայաստանում տեղի են ունենում։
Ես հակված չեմ «եթե»–ներով առաջնորդվելու, բայց մենք բոլորս հասկանում ենք, որ այս գործընթացը կոնկրետ ֆիզիկական հաշվեհարդարների, տնտեսական հաշվեհարդարների, քաղաքական հաշվեհարդարների վերաբերյալ սպառնալիքները, հատկապես ակտիվացան նախընտրական ժամանակահատվածում։ Գագիկ Ծառուկյանը երբևէ նախահարձակ չի եղել այս ամբողջ գործընթացում, արձագանքել է հնչած սպառնալիքներին, վիրավորանքներին, հարյուրավոր անգամներ ասել է, որ իր կլասը չի գցելու, բայց միևնույն է իր այս հորդորներից հետո անգամ միշտ հնչել է ոչ պատշաճ, ոչ քաղաքական հռետորաբանություն, որոնցից ոմանց Գագիկ Ծառուկյանը, այո, ստիպված է եղել անդրադառնալ այդ տերմինոլոգիայով»։
Ավելի վաղ NEWS.am–ը հայտնել էր, որ այսօր՝ հուլիսի 6–ի վառ առավոտյան խուզարկություն է իրականացվում Գագիկ Ծառուկյանի տանը։ Ավելի ուշ ԲՀԿ առաջնորդի խոսնակ Իվետա Տոնոյանը հայտնել էր, որ լայնածավալ խուզարկություններ են իրականացվում նաև «Մուլտի Գրուպ» կոնցեռնի կազմում ընդգրկված գրեթե բոլոր ընկերություններում, ինչպես նաև այդ կազմակերպությունների տնօրենների բնակարաններում։
ԲՀԿ անդամ Արման Աբովյանը հայտնել էր, որ Գագիկ Ծառուկյանի տունը շրջապատված է, ինչ–որ ռազմական հագուստով ավտոմատավորներ են։ Ավելի ուշ Աբովյանը նոր տեսանյութ է տարածել Ծառուկյանի տան դիմացից՝ նշելով, որ վերևում դրոններ են աշխատում. «Որոշ տվյալներով նաև Գագիկ Ծառուկյանին պատկանող կամ նրա հետ կապ ունեցող վայրեր են մտել խուզարկության. Խոսքը վերաբերում է Կոնյակի գործարանի, Օլիմպավանի, «Մուլտի վելնես» ընկերության մասին է»։
Այս առնչությամբ Քննչական կամիտեից NEWS.am-ին միայն հայտնել էին. «Քննչական կոմիտեում քննվող մեկ տասնյակից ավելի քրեական վարույթների շրջանակում 70-ից ավելի հասցեներում կատարվում են միաժամանակյա խուզարկություններ»։
Հիշեցնենք, որ օրեր առաջ դատախազությունը միջնորդություն էր ներկայացրել ԿԸՀ՝ Գագիկ Ծառուկյանի անձեռնմխելիությունը հաղթահարելու, որն այդպես էլ չէր քննարկվել։
Վարչապետ Նիկոլ Փաշինյանը նախընտրական քարոզարշավում սպառնացել էր ունեզրկել ու կալանավորել իր ընդդիմախոսներին։ Մասնավորապես, խոսքը Սամվել Կարապետյանի, Ռոբերտ Քոչարյանի և Գագիկ Ծառուկյանի մասին էր։